O‘zbekistonda meva va sabzavotlarning o‘rtacha eksport narxlari ma’lum qilindi

O‘zbekiston Savdo-sanoat palatasi meva va sabzavotlarning o‘rtacha eksport narxlarini ma’lum qildi.

East-Fruit tahlilchilari O‘zbekistonda sabzavot va mevalarni eksport qilish shartlari yomonlashganini qayd etgandi. Bunga sabab qilib Vazirlar Mahkamasi may oyidan boshlab ba’zi sabzavot va mevalarning tavsiya etilgan narxlarini minimal narxlarga o‘zgartirgani ko‘rsatilgan.

Eng qizig‘i, narx har bir mahsulot uchun sifat toifalari, navlari va boshqalar bo‘yicha o‘zgartirishsiz belgilandi. Bu esa meva va sabzavotlar uchun mutlaqo bema’nilikdir. Jahon amaliyoti shuni ko‘rsatadiki, bunday qarorlar hech qachon hech qaysi nuqtai nazardan ijobiy natijalarga olib kelmaydi, — degan edi East-Fruit tahlilchilari.

Savdo-sanoat palatasining bildirishicha, nodavlat notijorat tashkiloti eksport uchun minimal qiymatni Savdo-sanoat palatasi belgilab kelmoqda, hukumat emas.

Natijada eksportchilar o‘z mahsulotini yuqori narxda sotmoqda. Bu eksportni to‘xtatish degani emas va bugungi kunga qadar eksport bir soniyaga ham to‘xtamadi va to‘xtamaydi, — deyiladi palata munosabatida.

Ta’kidlanishicha, minimal narxlar belgilansa ham mahsulotlar yuqori narxda jo‘natilmoqda, bu esa eksportchilar uchun qo‘shimcha foyda degani.

Xususan, quyidagi mahsulotlarda narxlar sezilarli darajada ortgan:

• Gilos. Minimal qiymat 2,00 edi, amalda esa 2,53 dollardan sotilmoqda (2023-yilda 50 foizidan ortig‘i 0,93 dollardan eksport 11 000 so‘m qilingan).
• O‘rik. Minimal qiymat 1,20 edi, amalda esa 1,75 dollardan sotilmoqda. (2023-yilda 50 foizidan ortig‘i 0,83 dollardan eksport 9 600 so‘m qilingan).
• Limon. Belgilangan minimal qiymat 0,75 edi, amalda esa 1,23 dollardan sotilmoqda. (2023-yilda 50 foizidan ortig‘i 0,59 dollardan eksport 6 800 so‘m qilingan).
• Olxo‘ri. Belgilangan minimal qiymat 0,90 edi, amalda esa 1,39 dollardan sotilmoqda (2023-yilda 50 foizidan ortig‘i 0,34 dollardan eksport 4 000 so‘m qilingan).
• Shaftoli. Belgilangan minimal qiymat 1,50 edi, amalda esa 2,92 dollardan sotilmoqda (2023-yilda 50 foizidan ortig‘i 2,06 dollardan eksport  24 000 so‘m qilingan).
• Qulupnay. Belgilangan minimal qiymat 1,20 edi, amalda esa 1,27 dollardan sotilmoqda (2023-yilda 50 foizidan ortig‘i 0,78 dollardan eksport  9 000 so‘m qilingan).
• Pomidor. Belgilangan minimal qiymat 0,90 edi, amalda esa 0,96 dollardan sotilmoqda (2023-yilda 50 foizidan ortig‘i 0,45 dollardan eksport 5 200 so‘m qilingan).
• Bodring. Belgilangan minimal qiymat 0,70 edi, amalda esa 0,83 dollardan sotilmoqda (2023-yilda 50 foizidan ortig‘i 0,37 dollardan eksport 4 300 so‘m qilingan).
• Qizil bosh karam. Belgilangan minimal qiymat 0,50 edi, amalda esa 0,55 dollardan sotilmoqda (2023-yilda 50 foizidan ortig‘i 0,12 dollardan eksport 1 400 so‘m qilingan).
• Lavlagi. Belgilangan minimal qiymat 0,32 edi, amalda esa 0,44 dollardan sotilmoqda (2023-yilda 50 foizidan ortig‘i 0,23 dollardan eksport 2 700 so‘m qilingan).

Savdo-sanoat palatasi xabarida aytilishicha, minimal narx belgilanishiga doir qaror eksportyor korxonalarga teng va qulay sharoit yaratish imkonini beradi. Hech bir davlat organiga eksportni cheklash yoki to‘xtatib qo‘yish vakolati berilmagan.