Turkiyaning Istanbul shahrida o‘zbekistonlik 28 yoshli ayol turmush o‘rtog‘ini pichoqlab o‘ldirgani haqida xabarlar taralgandi. O‘zbekistonning Istanbul shahridagi Bosh konsulxonasi ayolning xolasi bilan suhbatlashib, holat yuzasidan qo‘shimcha ma’lumot berdi.
Dastlabki ma’lumotlarga ko‘ra, vafot etgan Turkiya fuqarosi spirtli ichimlik iste’mol qilgan. U o‘zbekistonlik turmush o‘rtog‘iga nisbatan muntazam ravishda jismoniy va ruhiy bosim o‘tkazib kelgan.
Voqea sodir bo‘lgan vaqtda xonada boshqa shaxslar ham bo‘lgan. Dastlabki tergovga ko‘ra, marhum ayolni bo‘g‘ayotgan paytda orqa tomondan pichoq bilan jarohatlangan. Bu esa uni boshqa shaxs tomonidan pichoqlangan bo‘lishi ehtimolini istisno etmaydi.
Ayol jiyani turmush o‘rtog‘ini moddiy qiyinchilik sabab o‘ldirgani haqidagi xabarlarni rad etib, uni o‘ldirmaganini, hali sud tomonidan aybdor deb topilmaganini bildirib, xabarni tarqatayotganlardan buni inobat olishni so‘radi.
“Bu xabarni tarqatganingizdan keyin onasi kasallanib, tanasining yarmi ishlamay qoldi. Aka-ukalari yuzi yerga qarab qoldi. Sizlardan iltimos, bunday xabarlarni chiqarmang”, dedi va xabarni tarqatayotganlar bilmagan ko‘p narsa borligini qayd etib o‘tdi.
Hozirda ayolga zarur konsullik-huquqiy yordam ko‘rsatilmoqda va unga advokat biriktirilgan. Mazkur holat Bosh konsulxona tomonidan nazoratga olingan.
Turkiya nashrlari bergan ma’lumotga ko‘ra, er-xotinning turmush qurganiga 4 yil bo‘lgan va bir nafar bolasi bor.
Izoh (0)