Istanbuldagi O‘zbekiston Bosh konsulxonasi fuqarolarni aeroportlarda begonalarning yuklarini olmaslikka chaqirdi.
Qayd etilishicha, Turkiya va O‘zbekiston o‘rtasidagi aviaqatnovlar davomida ayrim shaxslar aeroportlarda o‘z yuklarini O‘zbekistonga yetkazib berishni iltimos qilishi mumkin. Ular turli bahonalar bilan (masalan, og‘ir kasal qarindoshi borligi yoki yukni jo‘natish imkoniyati yo‘qligi) sizni ishontirishga harakat qiladi.
“Bunday va’dalarga ishonmang va begona yukni hech qanday holatda qabul qilmang”, deya ogohlantirdi Bosh konsulxona.
Ma’lum qilinishicha, o‘tgan yillarda bir necha O‘zbekiston fuqarolari aynan shunday vaziyatlarga tushib qolgan va noqonuniy yuklarni, jumladan narkotik moddalar va soxta hujjatlarni bilmasdan olib o‘tganlari uchun hibsga olingan.
2023-yilda Istanbul aeroportida 27 yoshli O‘zbekiston fuqarosi noma’lum shaxsning iltimosiga binoan yukni olib o‘tishga rozi bo‘lgan. Biroq, chegarada tekshiruv vaqtida yuk ichidan katta miqdorda narkotik moddalar topilgan. Natijada u 10 yillik qamoq jazosiga hukm qilingan.
2022-yilda Antaliya shahridan Toshkentga qaytayotgan yana bir fuqaro o‘ziga notanish kishining yukini olib o‘tishga rozi bo‘lgan. Yuk tarkibida soxta pasport va noqonuniy hujjatlar borligi aniqlanib, fuqaro bir necha yilga ozodlikdan mahrum etilgan.
Bosh konsulxona ehtiyotsizlik yoki begonalarga bo‘lgan ishonch og‘ir jinoiy oqibatlarga olib kelishi mumkinligini bildirib, begona odamlarning yukini hech qanday holatda qabul qilmaslikni so‘radi.
Bundan avval Bosh konsulxona Turkiyadagi o‘zbekistonliklarni noqonuniy migratsiyaga ko‘maklashish uchun katta pul mukofoti va’da qilayotgan jinoiy guruhlardan ogohlikka chaqirgandi. Turkiyada o‘zbekistonliklar viza bilan bog‘liq firibgarlikka uchrayotganini ham ma’lum qilgandi.
Izoh (0)