Tailandning Pattaya shahrida og‘ir kasallikka chalingan o‘zbekistonlik fuqaro vatanga qaytarildi. Bu haqda “Dunyo” axborot agentligi xabar berdi.
Ma’lum qilinishicha, 3-mart kuni O‘zbekiston fuqarosi I.S. Tailandning Pattaya shahrida insultga chalinishi natijasida shoshilinch tarzda kasalxonaga yotqizilgan. U og‘ir jarrohlik operatsiyasini boshdan kechirgan. Amalga oshirilgan muolajalarga qaramay, bemor tanasining chap tomoni ishlamay qolgan.
Fuqaro Tailandga ishlash maqsadida kelgan, ammo tibbiy sug‘urta olmagan, shuningdek, ish beruvchi bilan mehnat shartnomasini ham tuzmagan. Bu holatlar tibbiy xarajatlarni to‘lashda qiyinchiliklar sabab bo‘lgan. 28-mart kuni bemorning yaqinlari, do‘stlari va faol vatandoshlar saʼy-harakatlari bilan tibbiy xarajatlarni qoplash va Uzbekistan Airways samolyoti orqali bemorni oilasi bag‘riga qaytarish uchun zarur mablag‘ yig‘ilgan.
Bunday holatlar ko‘payib borayotgani munosabati bilan O‘zbekistonning Bangkokdagi Bosh konsulxonasi O‘zbekiston fuqarolariga chet elga sayohat qilish yoki ishlash uchun ketayotganda tibbiy sug‘urta olish, shuningdek, ish beruvchi bilan mehnat shartnomasini tuzish zarurligini eslatib o‘tdi. Ushbu chora-tadbirlar favqulodda vaziyatlarda himoya va zarur yordam olishda asqatadi.
“Biz barcha fuqarolarni chet elda bo‘lish vaqtida o‘z salomatligiga eʼtiborliroq bo‘lishga chaqiramiz”, deyiladi diplomatik vakolatxona xabarida.
Bosh konsulxona xorijda og‘ir ahvolda qolgan o‘zbekistonliklarga konsullik-huquqiy yordam ko‘rsatish ishlarini davom ettirayotganini bildirdi.
28-mart kuni Myanma va qo‘shni Tailandda 7,7 va 6,4 magnitudali ikkita kuchli zilzila yuz bergandi. Bangkokdagi O‘zbekiston Bosh konsulxonasi bergan ma’lumotga ko‘ra, zilziladan so‘ng jarohat olgan O‘zbekiston fuqarolari aniqlanmadi. Bosh konsulxona Tailandning tegishli idoralari bilan aloqada va vaziyatni diqqat bilan kuzatib bormoqda.
Izoh (0)