O‘zbekistonning Istanbul shahridagi Bosh konsulxonasi Turkiyadagi yolg‘on ish takliflaridan ogohlantirdi.
Qayd etilishicha, so‘nggi paytlarda ayrim firibgar shaxslar O‘zbekiston fuqarolariga Turkiyada yuqori maoshli ish taklif qilib (asosan fuqarolarning tanish-bilishlari orqali), ularni aldash holatlari ko‘paymoqda.
Ushbu shaxslar ishga joylashish, uy-joy va qonuniy hujjatlarni rasmiylashtirish bo‘yicha yolg‘on vaʼdalar berib, vatandoshlarni og‘ir ahvolga solmoqda.
Agar siz noqonuniy mehnat faoliyatini boshlasangiz yoki firibgarlar tomonidan aldansangiz, quyidagi muammolarga duch kelishingiz mumkin:
- ish haqi vaʼda qilinganidan ancha kam to‘lanishi yoki umuman berilmasligi;
- ish sharoitlari og‘ir yoki yomon bo‘lishi;
- ish beruvchi tomonidan noqonuniy ekspluatatsiya va haqorat;
- Turkiyada noqonuniy mehnat qilish oqibatida deportatsiya va jarimalar;
- Turkiyaga kelganingizdan so‘ng, aeroportda kutib olish vaʼda qilinib, pulingiz o‘zlashtirilgandan keyin vositachining g‘oyib bo‘lishi.
Yuqoridagi holatlarda vatandoshlarimiz va ish taklif qilgan shaxslar o‘rtasida hech qanday rasmiy hujjat mavjud bo‘lmagani sababli firibgarlarni javobgarlikka tortish juda qiyin bo‘ladi.
Turkiyada ishlash uchun chet ellik fuqarolar maxsus ruxsatnoma — ish ruxsatnomasiga (Çalışma İzni) ega bo‘lishlari shart!
Ish izlash uchun faqatgina O‘zbekiston Respublikasi Vazirlar Mahkamasi huzuridagi Migratsiya agentligi (www.migration.uz) (http://www.migration.uz/) yoki litsenziyaga ega rasmiy agentliklarga murojaat qiling. Turkiyaga noqonuniy yo‘llar bilan kelmang va ishonchsiz shaxslarga pul bermang. Ish sharoitlari, ruxsatnomalar va maosh bo‘yicha rasmiy hujjat talab qiling!
O‘zingiz va yaqinlaringizni firibgarlardan ehtiyot qiling! Ishga faqat rasmiy yo‘llar bilan joylashing, deyiladi xabarda.
So‘nggi kunlarda Istanbul shahrida turli norozilik namoyishlari va ommaviy yig‘ilishlar o‘tkazilayotgani sababli Bosh konsulxona Turkiyadagi o‘zbekistonliklarni ehtiyotkorlikka chaqirgan edi.
Xavfsizlikni taʼminlash uchun quyidagilarga amal qilish zarur:
- har qanday norozilik namoyishlari, mitinglar va ommaviy yig‘inlardan uzoqroq bo‘lish;
- odam gavjum joylarga bormaslik va harakatlanish yo‘nalishingizni oldindan rejalashtirish;
- ijtimoiy tarmoqlarda ehtiyotkorlik bilan harakat qilish, provokatsion xabarlar joylashtirmaslik va tarqatmaslik;
- rasmiy xabarlarga eʼtibor berish va vaziyat bo‘yicha yangiliklarni kuzatib borish;
- favqulodda holatlarda Bosh konsulxona bilan bog‘lanish.
“Sizning xavfsizligingiz biz uchun muhim! Iloji boricha ehtiyot bo‘ling va huquq-tartibot idoralarining ko‘rsatmalariga rioya qiling”, deyiladi xabarda.
Izoh (0)