O‘zbekistonning Rostov Don shahridagi Bosh konsulxonasi diplomatlari Rossiyaning Volgograd viloyatidagi Xorijiy fuqarolarni vaqtincha saqlash markazi rahbariyati va bu yerda bo‘lgan O‘zbekiston fuqarolari bilan uchrashuv o‘tkazdi. Bu haqda “Dunyo” AA xabar berdi.
Maʼlum qilinishicha, markaz rahbariyati bilan kechgan muloqot chog‘ida hozirgi kunda mazkur muassasada 11 nafar O‘zbekiston fuqarosi vaqtincha saqlanayotgani maʼlum qilindi. Rossiya tomoni, shuningdek, so‘nggi paytlarda O‘zbekiston fuqarolari ishlash huquqini beradigan hujjatlarni o‘z vaqtida rasmiylashtirishga masʼuliyat bilan yondashayotganini bildirdi.
Tomonlar markazda bo‘lgan fuqarolarga zarur konsullik xizmatlarini ko‘rsatish tartibi va ularni tez fursatlarda O‘zbekistonga qaytarish masalasi yuzasidan fikr almashdi.
Muzokaralar natijasida ushbu markazda bo‘lib turgan barcha o‘zbekistonliklarni muddatidan oldin oilasi bag‘riga qaytarish bo‘yicha kelishuvga erishildi.
Diplomatlar, shuningdek, muassasada saqlanayotgan vatandoshlar bilan alohida uchrashuv o‘tkazdi.
Vatandoshlarga qonuniy mehnat migratsiyasini amalga oshirish tartibi, qabul qiluvchi davlat qonunchiligiga rioya qilish zarurligi taʼkidlandi.
O‘zbekistonga qaytarilayotgan fuqarolar
2025-yilning boshlarida Rossiyaning Tiva Respublikasi Oq Dovurak shahrida vaqtincha ishlayotgan to‘rt nafar O‘zbekiston fuqarosi vatanga qaytarildi. Fuqarolarning yashash joyida sodir bo‘lgan kuchli yong‘in natijasida ularning hujjatlari, shu jumladan, pasportlari yo‘qolgan.
27-fevral kuni Makkada og‘ir kasallikka chalingan o‘zbekistonlik vatanga qaytarildi. Fevral oyi oxirida Rossiyada ikki bolasi bilan qiyin vaziyatda qolgan ayol O‘zbekistonga qaytarildi.
2025-yil 5-mart kuni Rossiyaning Vladivostok shahrida og‘ir tan jarohati olgan O‘zbekiston fuqarosi vatanga qaytarildi. Mart oyining o‘rtalarida Novosibirskdagi Bosh konsulxonasi ko‘magida Rossiyaning Saxa respublikasi Neryungri shahrida qiyin hayotiy vaziyatga tushib qolgan ona va uning to‘rt nafar farzandi O‘zbekistonga qaytarildi. 17-mart kuni ota-ona qaramog‘isiz qolgan 10 nafar voyaga yetmagan bola Qozog‘istondan O‘zbekistonga qaytarildi. Shuningdek, Rossiyada ota-ona qaramog‘isiz qolgan 30 nafar bola O‘zbekistonga qaytarildi.
Izoh (0)