Туркиянинг Истанбул шаҳрида ўзбекистонлик 28 ёшли аёл турмуш ўртоғини пичоқлаб ўлдиргани ҳақида хабарлар таралганди. Ўзбекистоннинг Истанбул шаҳридаги Бош консулхонаси аёлнинг холаси билан суҳбатлашиб, ҳолат юзасидан қўшимча маълумот берди.
Дастлабки маълумотларга кўра, вафот этган Туркия фуқароси спиртли ичимлик истеъмол қилган. У ўзбекистонлик турмуш ўртоғига нисбатан мунтазам равишда жисмоний ва руҳий босим ўтказиб келган.
Воқеа содир бўлган вақтда хонада бошқа шахслар ҳам бўлган. Дастлабки терговга кўра, марҳум аёлни бўғаётган пайтда орқа томондан пичоқ билан жароҳатланган. Бу эса уни бошқа шахс томонидан пичоқланган бўлиши эҳтимолини истисно этмайди.
Аёл жияни турмуш ўртоғини моддий қийинчилик сабаб ўлдиргани ҳақидаги хабарларни рад этиб, уни ўлдирмаганини, ҳали суд томонидан айбдор деб топилмаганини билдириб, хабарни тарқатаётганлардан буни инобат олишни сўради.
“Бу хабарни тарқатганингиздан кейин онаси касалланиб, танасининг ярми ишламай қолди. Ака-укалари юзи ерга қараб қолди. Сизлардан илтимос, бундай хабарларни чиқарманг”, деди ва хабарни тарқатаётганлар билмаган кўп нарса борлигини қайд этиб ўтди.
Ҳозирда аёлга зарур консуллик-ҳуқуқий ёрдам кўрсатилмоқда ва унга адвокат бириктирилган. Мазкур ҳолат Бош консулхона томонидан назоратга олинган.
Туркия нашрлари берган маълумотга кўра, эр-хотиннинг турмуш қурганига 4 йил бўлган ва бир нафар боласи бор.
Изоҳ (0)