28-mart kuni Myanma va qo‘shni Tailandda 7,7 va 6,4 magnitudali ikkita kuchli zilzila yuz berdi. Bangkokdagi O‘zbekiston Bosh konsulxonasining xabar berishicha, Bangkokdagi qurilishi tugallanmagan bino qulab tushishi oqibatida 8 kishi vafot etgan va 81 nafar kishi bedarak yo‘qolgan.
Bosh konsulxona tomonidan zilziladan so‘ng jarohat olgan O‘zbekiston fuqarolari aniqlanmadi. Bosh konsulxona Tailandning tegishli idoralari bilan aloqada va vaziyatni diqqat bilan kuzatib bormoqda.
Agar ushbu hududdagi O‘zbekiston fuqarolariga yordam kerak bo‘lsa, ushbu raqam orqali bog‘lanish mumkinligi aytildi: +66 2 675 3995
Zilzila oqibatlari
Mandalay va Sikayn shaharlari orasidagi Iravadi daryosi ustidagi ko‘prik qulab tushdi, tarixiy binolar, jumladan, Chauktoji pagodasi va XIX asrga oid Mandalay saroyi devorlari shikastlandi.
Mahalliy aholining aytishicha, ko‘plab uylar butunlay vayron bo‘lgan, odamlar takroriy silkinishlar xavfidan qo‘rqib, binolarga qaytishga botina olmayapti.
So‘nggi ma’lumotlarga ko‘ra, Myanmadagi zilzila oqibatida 144 kishi halok bo‘lgan, qurbonlar soni yana ortishi mumkin. Bu haqda mamlakat davlat ma’muriy kengashi raisi, bosh vazir va katta general Min Aun Xlayn ma’lum qilgan.
Izoh (0)