O‘zbekistonning Istanbuldagi Bosh konsulxonasi Turkiyada o‘zbekistonliklar viza bilan bog‘liq firibgarlikka uchrayotganidan ogohlantirdi.
Ma’lum qilinishicha, so‘nggi vaqtlarda Turkiya hududida ayrim toifadagi jismoniy va yuridik shaxslar tomonidan O‘zbekiston fuqarolariga yirik pul mablag‘lari evaziga AQSHga doimiy yashashga yuborish, shuningdek, Yevropa mamlakatlarining vizalarini rasmiylashtirib berishni va’da qilish orqali firibgarlik jinoyatlarining sodir etilishi holatlari ko‘paymoqda.
Bu toifadagi shaxslarga ishongan fuqarolari jiddiy muammolarga duch kelib, ularning ko‘rsatmasi bilan turli xorijiy davlatlarga, asosan Osiyo va Afrika davlatlariga borib, u yerda sarson-sargardon bo‘lmoqda.
“Kuni kecha AQSHga ketish ilinjida firibgarlar tuzog‘iga tushib, Afrika va Lotin Amerikasi davlatlarida farzandi bilan og‘ir ahvolda qolgan yana bir ayol vatandoshimiz Bosh konsulxona yordamida O‘zbekistonga yuborildi”, deyiladi xabarda.
Bosh konsulxonasi noqonuniy migratsiya quyidagi jiddiy oqibatlarga olib kelishidan ogohlantirdi:
- pul mablag‘laringizni firibgarlar o‘zlashtirib yuborishi;
- hujjatlaringizning noqonuniy yo‘l bilan olib qo‘yilishi;
- chet elda hujjatsiz qolib, huquqiy muammolarga duch kelish;
- jinoiy javobgarlikka tortilish;
- deportatsiya yoki uzoq muddatli taqiqlarga uchrash.
“AQSHga yoki Yevropa mamlakatlariga qonuniy yo‘l bilan chiqish uchun faqat rasmiy vakolatli idoralarga murojaat qiling. Vizani yoki AQSHga noqonuniy o‘tishni va’da qilib, pul talab qilayotgan shaxslarga ishonmang”, deya ogohlikka chaqirdi Bosh konsulxona.
Avvalroq O‘zbekistonning Istanbuldagi Bosh konsulxonasi Turkiyada ayrim jinoiy guruhlar O‘zbekiston fuqarolariga katta pul mukofoti va’da qilib, ularni Yevropa ittifoqiga, asosan Gretsiyaga noqonuniy muhojirlarni dengiz orqali o‘tkazishda vositachi sifatida ishlatishga harakat qilayotgani haqida xabar bergandi.
1-fevraldan Turkiyaga shartli kirish (şartlı giriş) tartibi bekor qilinganini ham e’lon qilgandi. Qonuniy qolish muddati tugagan yoki yashash guvohnomasi (ikamet izni) olish rad etilgan fuqarolarni ushbu mamlakat qonunini hurmat qilgan holda tark etishni so‘radi. Chunki bu turdagi qoidabuzarliklar Turkiyaga qaytish imkoniyatining cheklab qo‘yilishiga sabab bo‘lishi mumkin.
Izoh (0)