BMT rahbarligidagi xalqaro ekspertlar guruhi Bashar Asad hukumati, shuningdek IShIDning Umm-Xosh va Xon-Shayxunda kimyoviy qurollar qo‘llanilishi bilan bog‘liq ikki holatga aloqadorligini isbotlovchi dalillarni taqdim etdi. Bu haqda BMT va Kimyoviy qurollarni taqiqlash tashkilotining qo‘shma tuzilmasi rahbari Edmon Mulening so‘zlariga asoslanib, “Korrespondent.net” xabar bermoqda.
“Bunday xulosaga kelish uchun asos bo‘la oladigan yetarlicha dalillar to‘plandi”, — deydi Mule.
Qo‘shma tuzilma ma’ruzasida 2016-yilning sentabr oyida IShID tomonidan Umm-Xoshda, 2017-yilning aprelida Xon-Shayxunda Suriya hukumat armiyasi tomonidan kimyoviy quroldan foydalanilganini tasdiqlovchi dalillar keltiriladi.
Qo‘shma tuzilma, shuningdek mustaqil ekspertlar tahlili va bir necha tan olingan ekspertlar bahosini ham oldi.
Xabarda qayd etilishicha, kimyoviy quroldan foydalanishning aniq holatlari haqidagi ma’lumotlar 12 davlat, xususan Suriya yordamida to‘plandi.
Ekspertlar 30 dan ortiq guvohlar ko‘rsatmasini tingladi, 2,4 mingdan ortiq fotosuratlar va 1,2 mingta videoni ko‘rib chiqdi. Bundan tashqari, 120 dan ortiq audioyozuvlar tinglandi va 630 dan ortiq hujjat o‘rganildi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)