Сурияда Башар Асад режими ағдарилганидан кейин 100 дан ортиқ кимёвий қурол сақлаш объектлари қолмоқда. Бу ҳақда Кимёвий қуролларни тақиқлаш бўйича халқаро ташкилот маълумотларига таяниб, The New York Times хабар берди.
Маълумотлар ташқи тадқиқотчилар, нотижорат гуруҳлар ва аъзо давлатлар томонидан тақдим этилган разведка маълумотларига асосланади. Асад ўн йилдан ортиқ давом этган фуқаролар уруши давомида исёнчилар ва Сурия тинч аҳолисига қарши зарин, хлор ва ипритли қуроллардан фойдаланган.
Зарин асаб тизимини шикастловчи модда бўлиб, бир неча дақиқада ўлимга олиб келиши мумкин. Биринчи жаҳон урушида машҳур бўлган хлор ва иприт газлари кўз ҳамда терини куйдиради, ўпкани суюқлик билан тўлдириб, одамларни қуруқликда бўла туриб чўкаётгандек ҳолатга солади.
Урушнинг дастлабки йилларида ҳукумат кимёвий қурол ишлаб чиқариш ва сақлаш бўйича 27 та объект мавжудлигини тан олган. Ушбу объектлар экспертлар томонидан текширилган ва уларни ёпишга буйруқ берилган.
Бироқ Асад режими камида 2018 йилгача кимёвий қуролдан фойдаланишда давом этган. Бундан ташқари, унинг ҳукумати асосий кимёвий прекурсорларни импорт қилган.
Баъзи кимёвий қурол омборлари ғорларда ёки сунъий йўлдош тасвирлари ёрдамида топиш қийин бўлган бошқа жойларда яширинган бўлиши мумкин. Кимёвий қуролнинг етарли даражада ҳимояланмагани хавфи юқори. Асадни қўллаб-қувватловчи жангарилар ушбу кимёвий қуролга эга бўлиши хавотир уйғотмоқда.
Сурия Мудофаа вазирлиги қуроллар ҳақидаги саволларга жавоб беришдан бош тортди ва бу саволлар унинг ваколати доирасига кирмаслигини қисқача маълум қилди.
Изоҳ (0)