AQSh boshchiligidagi koalitsiya IShID terrorchilik tashkiloti Suriya va Iroq hududida kimyoviy quroldan foydalanganini aniqladi. Bu haqda koalitsiyaning rasmiy vakili Rayan Dillonga asoslanib, “RIA Novosti” xabar berdi.
“Biz ikkita turli joydan kimyoviy moddalari mavjud RPG (tankka qarshi qo‘l granatamyotlari) granatalari va minalarni topdik, ulardan kimyoviy qurol sifatida foydalanishga harakat qilingan. Shuningdek, biz aralashmasidan kimyoviy qurol yaratish mumkin bo‘lgan sanoat mahsulotlari materiallari zaxirasini ham ko‘rdik”, — dedi Dillon.
Rasmiy Damashq bir necha bor ma’lum qilganiga qaramay, avgust oyida koalitsiya IShID jangarilarining Suriyada kimyoviy quroldan foydalanganliklari haqida bilmasligini ta’kidlagan edi.
19-oktabr kuni Davlat departamenti Suriyada kimyoviy qurollar boshqa bir terrorchilik tashkiloti — “Tahrir ash-Shom” tomonidan qo‘llanilganini birinchi bor tan oldi. Rossiya Mudofaa vazirligining ta’kidlashicha, guruh faoliyat ko‘rsatayotgan Idlib viloyatida “faqatgina bir marta kimyoviy quroldan foydalanish holati qayd etilgan — Xon-Sheyxunda”, biroq AQSh unda hukumat qo‘shinlarini ayblagan. Keyinroq BMT ekspertlari Suriya prezidenti Bashar Asad tuzumini joriy yil 4-aprelida Xon-Sheyxun shahrida amalga oshirilgan kimyoviy hujum uchun javobgar deb topdi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)