Doramalar davri qanday boshlangandi? Dunyo tomoshabinlarini ekran qarshisiga mixlagan eng mashhur seriallar

1990-yillarning oxiri 2000-yillarning boshlarida, dastlabki doramalar kassetalarga joylashtirilganida va bugungi kabi raqobat bo‘lmaganida, minglab odamlar ularni xarid qilib, qiziqish bilan tomosha qilar, qahramonlarning taqdiri uchun tashvishlanardi. Asosiy aktyorlar esa haqiqiy yulduzlarga aylanardi. Shu davrda hind kinosining davri koreys to‘lqini bilan almashdi. Hozirda bu seriallar allaqachon koreys kinoteatrining klassikasi hisoblanadi.

Quyida doramalar davrini boshlagan 5 ta mashhur koreys seriali haqida hikoya qilamiz.

1. “Qalbim chechagi”

Bu reytingni, albatta, “Zolushka”ning (koreyscha versiyasi) hikoyasi ochib beradi:

Syujet: Yun I (Chxve Chin Sil) ismli qiz otasining vafotidan keyin yetimxonaga tushadi va u yerda otasining do‘sti uni o‘z oilasiga olib boradi. Yomon o‘gay ona, Son xonim va o‘gay singlisi Yun Ini o‘zlarining dunyosiga mos emas deb hisoblab, uni qabul qilmaydi. Shuning uchun qahramon o‘z baxtini va taqdirini o‘zi qurishga qaror qiladi. Va bunda unga ikki kelishgan yigit yordam beradi: biri otasining qarshiligiga qaramay, qo‘shiqchi bo‘lishni orzu qilgan “shahzoda” Kan Min (An Je Uk) ikkinchisi moda uyi bosh dizayneri Li Jun Xi (Cha In Pyo).

Serial ko‘pchilikka nafaqat taʼsirli syujeti va aktyorlar ijrosi, balki “Forever” kabi taʼsirli qo‘shiqlari bilan ham juda manzur bo‘ldi, bu qo‘shiqni An Je Uk ijro etgan:

“Qalbim chechagi” O‘zbekiston televideniyesida namoyish etilgan birinchi koreys seriali bo‘ldi. Dorama MDH mamlakatlarida shunchalik mashhur bo‘ldiki, hatto uni rus va o‘zbek tillariga to‘liq tarjima qilishdi.

Birinchi marta televideniyening hiti sifatida qiziqarli kriminal va jangari filmlar emas, balki tomoshabinlarning qalbini eritib yuboradigan nozik va hissiy koreys muhabbat hikoyalari paydo bo‘ldi.

2. “Zolushka uchun tufli”

Syujet: Ikki opa-singil, Txe Xi (Kim Ji Xo) va Yun Xi (Kim Xyon Ju) hayoti haqida drama. Ular ota-onalarini yo‘qotadi va taqdirning irodasi bilan 15 yilga ajralib qolishadi. Ulardan biri begona oilaning qo‘liga tushadi, xotirasini yo‘qotadi, qashshoqlikda yashaydi, lekin baribir tabassum qilishni davom ettiradi. Ikkinchisi esa aksincha, asl bobosini topadi va istagan narsasiga ega bo‘ladi. Lekin uni bolalikda singlisini yo‘qotgani uchun aybdorlik hissi tark etmaydi. Va tez orada ular nihoyat bir-birlarini topadi va bir erkakka oshiq bo‘lishadi...

Bu doramada “Quyosh xo‘jayini”, “Oh, mening Veneram” va boshqa doramalardagi rollari bilan mashhur bo‘lgan yosh So Ji Sopni ko‘rish mumkin.

3. “Qish sonatasi”

Butun Osiyo bo‘ylab mashhur bo‘lgan “Qish sonatasi”ning oxirgi qismi Yaponiya teletomoshabinlarining to‘rtdan bir qismini ekranlarga mixlab qo‘ydi!

Syujet: Kan Jun Sang (Pe Yon Ju) ismli o‘rta maktab o‘quvchisi Seuldan onasining tug‘ilgan shahriga keladi va yangi maktabga o‘tadi. U juda yolg‘iz va sovuqqon. Shuning uchun sinfdoshi Yu Jin (Chxve Ji U) u bilan yaqinroq tanishishga qaror qiladi. Lekin bir kuni maktab safarida u o‘rmonda yo‘qolib qoladi va uni Jun Sang qutqaradi. Shu paytdan boshlab uning yuragidagi muz asta-sekin eriy boshlaydi va u Yu Jinga oshiq bo‘ladi. Lekin fojia sodir bo‘ladi: Yangi yil bayrami arafasida Jun Sang avtohalokatga uchrab halok bo‘ladi...

Oradan 10 yil o‘tadi. Sobiq sinfdoshlar yana birga to‘planib, Yu Jin va bolaligidan beri unga oshiq bo‘lgan San Xyuk (Pak Yon Xa)ning unashtiruvini nishonlaydi. Ularning do‘sti O Che Rin (Pak Sol Mi) ham o‘z sevgilisi Li Min Xyo bilan keladi, u vafot etgan Jun Sangning o‘zi bo‘lib chiqadi...

Serialning baʼzi sahnalari suratga olingan Nami oroli (Chunxon shahri) Janubiy Koreyaning eng mashhur sayyohlik joylaridan biriga aylandi. Dorama chiqqandan keyin sayyohlar soni uch baravar ko‘paydi. Mehmonlar serialning bosh qahramonlari kabi xiyobonlarda sayr qilishlari yoki velosipedda uchishlari mumkin.

Shuningdek, u yerda Jun Sang va Yu Jin personajlariga o‘rnatilgan haykalni ko‘rish va uning yonida suratga tushish mumkin.

Nomidan ham anglab olish mumkin, serialda juda chiroyli va atmosferali musiqa ko‘p. Dorama qo‘shiqlari o‘sha davrning mashhur xonandasi Ryu tomonidan ijro etilgan. Bundan tashqari, skripka va fortepiano uchun instrumental saundtreklarni, jumladan, “River flows in you”, “Kiss the rain”, “Love hurts” va boshqa taronalarning muallifi bo‘lgan dunyoga mashhur koreys bastakori Yiruma asarlarini eshitish mumkin.

Dorama “koreys to‘lqinining” dastlabki namoyon bo‘lishlaridan biri edi. Serialning mashhurligi fonida 2009-yilda uning anime versiyasi, myuzikl, videoo‘yinlar chiqdi. O‘sha paytda O‘zbekiston bozorlarida qahramonlar tasvirlangan ko‘plab mahsulotlarni (futbolkalar, daftarlar, ruchkalar va boshqalar) topish mumkin edi.

“Qish sonatasi” butun dunyo bo‘ylab Janubiy Koreyaga katta qiziqish uyg‘otdi va bundan ham ajablanarlisi, hatto Yaponiya bilan munosabatlarni yumshatishga sabab bo‘ldi.

Chiroyli tabiat manzaralari, taʼsirli va hayajonli syujet, aktyorlarning to‘g‘ri tanlangani, serial voqealariga mos keladigan musiqiy bezak tomoshabinlarni o‘ziga jalb qildi, ularni har kuni kechqurun yangi qismlarni tomosha qilishga shoshiltirdi va ularda chuqur qayg‘u, samimiyat va yorqin quvonch kabi his-tuyg‘ularni uyg‘otdi.

4. “Saroy javohiri”

Tarixiy doramalar koreys kinematografiyasida alohida o‘rin tutadi. Ayniqsa, kuchli ayollar taqdiri haqida hikoya qiluvchi filmlar (“Imperator xonim Ki”, “Qirolicha Sondok”, “Chan Ok Chon”).

“Saroy javohiri” — xalqaro miqyosda hitga aylangan va 90 dan ortiq mamlakatda namoyish etilgan birinchi tarixiy doramalardan biri bo‘lib, uning daromadi 103 million dollardan oshdi. Shundan so‘ng koreys anʼanaviy madaniyati va tarixiga bo‘lgan qiziqish Eron, Turkiya, Saudiya Arabistoni, Peru, Kolumbiya, Misr, Avstraliya, AQSH, Yangi Zelandiya va Rossiya kabi mamlakatlarda yanada kuchaydi.

Syujet: Dorama haqiqiy voqealarga asoslangan va Choson sulolasi qiroli uchun birinchi ayol shifokor bo‘lishga muvaffaq bo‘lgan yetim qiz Chan Gim (Li Yon E) haqida hikoya qiladi. Ijtimoiy kamsitish davrida jasur va qatʼiyatli qahramon koreys oshxonasi va tibbiyotining sirlarini o‘rganib, hukmdorni kasallikdan davolashga harakat qiladi.

Albatta, serialda har qanday tarixiy dramada bo‘lgani kabi, taʼsirli va ayni paytda fojiali sevgi va do‘stlik hikoyalari, siyosiy fitnalar va boshqa qiziqarli syujet chiziqlari ham mavjud.

Tarixiy janrda film suratga olish juda qiyin, chunki o‘tmish davri voqealarini barcha tafsilotlari bilan iloji boricha aniq aks ettirish muhimdir. Va ushbu dorama yaratuvchilari bunga erishdi: tomoshabin koreys tabiatining rang-barang manzaralari, ulug‘vor saroylar, anʼanaviy kiyimlar (hanbok) va bezaklar orqali XV asr Choson atmosferasiga sho‘ng‘iydi.

Hatto qahramonlar dialoglarida ham qadimgi koreys tiliga xos murakkab nutqiy talaffuzni sezish mumkin. Va bu tasodifiy emas: aktyorlar o‘sha davr ruhini aniqroq yetkazish uchun maxsus talaffuzni o‘rgandi. Shuning uchun “Saroy javohiri”ni nafaqat eng mashhur, balki eng ishonchli tarixiy doramalardan biri deb hisoblash mumkin.

5. “Taqdir o‘yini”

“Taqdir o‘yini” doramasi, albatta, muvaffaqiyatga erishishi tabiiy edi. Qiziqarli syujet, isteʼdodli aktyorlar, Koreya va Cheju orolining ajoyib manzaralari, shuningdek, yoqimli musiqa va albatta Li Byon Xonning ajoyib ijrosi serial omadli bo‘lishini taʼminlagan.

Syujet: Bolaligida yetim qolgan Kim In Xa (Li Byon Xon) mohir qartaboz bo‘lgan amakisi tomonidan tarbiyalanadi. Jasur va ishonchli yigit boy oiladan bo‘lgan o‘g‘il — Chxve Yon Von (Chi Son) bilan yaqin do‘st bo‘ladi. Ko‘p o‘tmay, In Xa Min Su Yon (Son Xe Gyo) bilan tanishadi va unga oshiq bo‘ladi. Ammo u nafaqat uning qalbini, balki eng yaxshi do‘stining qalbini ham zabt etadi.

Yon Vonning otasining hiylalari tufayli In Xa qotillikda gumon qilinib, Amerikaga qochishga majbur bo‘ladi. Va u yerda professional poker o‘yinchisi sifatida martaba qozonib xalqaro miqyosda muvaffaqiyatga erishadi. Koreyaga qaytib kelgan qahramon o‘z sevgisi uchun sobiq do‘sti bilan kurashga kirishadi.

Serial eng yuqori reytinglarga erishdi. Koreyada ham, xorijda ham mashhurlikka, shuningdek, SBS Drama Awards va Baeksang Arts Awards mukofotlariga sazovor bo‘ldi. Li Byon Xon “Eng yaxshi televideniye aktyori” deb topildi.

Qiziqarli fakt: Chi Son “Taqdir o‘yini”dagi roli tufayli katta shuhrat qozondi, bu uning birinchi jiddiy ishi bo‘ldi. Dastlab, serial yaratuvchilari Li Byon Xon uchun sherik topishda qiyinchilikka duch kelishdi, chunki aksariyat nomzodlar mashhur aktyor bilan taqqoslanishdan qo‘rqib, rad etishdi.

O‘sha paytda bu sohada yangi bo‘lgan Chi Son, rejissyor Yu Chxol Yonning o‘zidan bu rolni so‘radi. Aktyorning o‘zi eslatishicha, o‘sha paytda u Li Byon Xonning isteʼdodini ortda qoldirishni xohlagan, lekin u qattiq ishlaganda ham, “bu cho‘qqiga chiqa olmasligini” anglagan.

Shunga qaramay, doramaning muvaffaqiyati tufayli Chi Sonning isteʼdodi eʼtiborsiz qolmadi va u boshqa mashhur loyihalarda (“So‘nggi raqsni menga qoldiring”, “Xo‘jayinni himoya qiling”, “Meni o‘ldir, meni davola”, “Sir” va boshqalar) rollarni oldi. Hozirda u eng mashhur va xarizmatik koreys aktyorlaridan biri hisoblanadi.

“Taqdir o‘yini” serialining original saundtreki “Like the first day” Pak Yon Xaning ijrosida haqiqiy hitga aylandi (aytgancha, “Qish sonatasi”da San Xyuk rolini aynan u o‘ynagan edi).