Rossiya va Belarus sentyabr oyida qo‘shma harbiy mashg‘ulot o‘tkazishni rejalashtirgan. Mashg‘ulot doirasida yadro quroli va “Oreshnik” raketalaridan qanday foydalanish mumkinligi rejalashtiriladi.
Belarus va Rossiya armiyasi birgalikda o‘tkazadigan mashg‘ulot yadro quroli va “Oreshnik” raketasidan qanday foydalanishni rejalashtirishni o‘z ichiga oladi. Bu haqda Belarus mudofaa vaziri Viktor Xrenin ma’lum qildi.
Mudofaa vazirining so‘zlariga ko‘ra, yadro quroli va “Oreshnik” raketalaridan foydalanish strategik tiyib turish vositasi hisoblanadi.
“Bu biz uchun eng avvalo strategik tiyib turishning muhim elementi. Davlat rahbari talab qilganidek, biz hamma narsaga tayyor bo‘lishimiz kerak. G‘arbiy va shimoliy chegaralarimizdagi vaziyatni ko‘rib turibmiz va militarizatsiya hamda harbiy faollikni befarq kuzata olmaymiz. Biz o‘zimizning ochiqligimiz va tinchlikparvarligimizni namoyish etamiz, biroq poroxni doimo quruq saqlash kerak”, dedi Xrenin.
Vazir bu qurollardan foydalanishni rejalashtirish mashqlari qanday tarzda amalga oshirilishini aniqlashtirmagan.
Rossiya va Belarusning strategik harbiy mashg‘ulotlari 12–16-sentyabr kunlari bo‘lib o‘tadi. Bundan maqsad — Rossiya va Belarusga uyushtirilishi mumkin bo‘lgan hujumlarni qaytarish qobiliyatini tekshirishdir.
Qayd etilishicha, 2024-yilda Rossiya va Belarus taktik yadro quroli bilan mashg‘ulotlar o‘tkazgan edi. Rossiya Mudofaa vazirligi bu haqdagi xabarlarni ommaviy ravishda e’lon qilib, mashg‘ulotni “G‘arbning provokatsion bayonotlari va tahdidlariga javob” sifatida izohlagan.
Meduza nashriga ko‘ra, yadro quroli bilan mashg‘ulotlar ayrim davlatlar tomonidan vaqti-vaqti bilan o‘tkaziladi, biroq ularning aksariyati boshqa mamlakatlarga axboriy bosim o‘tkazish uchun uyushtirilmaydi.
Izoh (0)