Xalq orasida “dorama” deb ataladigan koreys va xitoy seriallari o‘zbek tomoshabinlari orasida ancha yillardan beri ommalashib kelgan. Dastlab “drama” yoki “dorama” atamasi faqat Yaponiyada ishlatilgan bo‘lsa, endilikda ibora Sharqiy Osiyodagi har qanday serial uchun qo‘llanadi. Bugun biz sizga eng qiziqarli syujetga ega tarixiy dramalarni ko‘rishni taklif etamiz.
“Eng gullagan yoshlik chog‘imiz” (Our blooming youth) — 2023
Xitoyning mazkur tarixiy seriali detektiv va fentezi elementlarini o‘z ichiga olgan. Syujetga ko‘ra, valiahd shahzoda Li Xvan o‘z akasini zaharlaganlikda gumon qilinib, o‘z o‘limi haqida sirli bashorat oladi. Biroz takabburli xarakterga ega shahzodaga noma’lum shaxslar fitna uyushtiradi va u saroydan qochishga qaror qiladi. Shunda u ajoyib zakovat sohibi Min Chje Yi bilan uchrashib qoladi. Afsuski, oliyjanob qiz ham oilasining qotili sifatida ayblanib, barchadan yashirinib yurgan bo‘ladi. Oqibatda ular bir-biriga yordam berishga qaror qiladi. Min Chje Yi shahzodaga qo‘yilgan la’natni olib tashlashga va oilasining qotilini izlab topishga bel bog‘laydi.
Drama tomoshabin uchun kutilmagan burilishlar va noodatiy syujetga boydir. Min Chje Yi rolini koreyalik aktrisa va teleboshlovchi Chon So Ni, shahzoda rolini esa aktyor Pak Xen Shik ijro etgan.
“Shanyan haqida poema” (The Rebel princess) — 2021
Go‘zal va latofatli, ammo biroz mag‘rur malika Van Syuan Xitoyning nufuzli kanslerining qizi bo‘lgan. U bolaligidan cheksiz mehr va g‘amxo‘rlik bilan katta bo‘ladi. Biroq Syuan balog‘atga yetgach, otasi o‘zining siyosiy manfaatlari yo‘lida qizini oddiy oila farzandi — jangchiga turmushga berishga qaror qiladi. Yoshlar oila qurgach, turli xavf-xatarlar va xiyonatlarga to‘la yo‘lni bosib o‘tadi.
Van Syuan rolini mashhur aktrisa, “Geysha xotiralari”, “Uchar xanjarlar uyi” filmlari qahramoni Chjan Zyi o‘ynagan. Filmda uning turmush o‘rtog‘i, general obrazini aktyor Chjou Ivey (“Tadbirkorlar asri” seriali qahramoni) gavdalantirgan.
“Imperator ayol Ki” (Empress Ki) — 2013-2014
Janubiy Koreyada suratga olingan ushbu drama imperator oilasidan bo‘lgan qizning murakkab taqdiri haqida hikoya qiladi. Dramada 14-asrda sodir bo‘lgan voqealar tasvirlanadi. U vaqtda Koreya (avval “Koryo” deb atalgan) Mo‘g‘ullar imperiyasining vassali bo‘lgan.
Fitna, xiyonat, ayollar va qullarga nisbatan zo‘ravonlik davrida mo‘jizaviy tarzda omon qolgan Ki Sin Nyan kelajakda Osiyoning eng kuchli ayollaridan biriga aylanishi haqida bilmas edi. U bolaligida onasidan ayrilgan va omon qolish uchun o‘zini o‘g‘il bola qilib ko‘rsatishga majbur bo‘lgan. Ko‘p o‘tmay, Koryo mustaqilligini yo‘qotib, Yuanning bir qismiga aylanadi va Ki Sin Nyan Mo‘g‘ullar imperiyasi hukmdoriga xizmatkorlik qiladi. Keyinchalik imperatorning sevimli kanizagiga aylangan qiz oldida yangi imkoniyatlar ochiladi.
Ayol imperator Ki rolini aktrisa Ha Ji Von (“Koreya”, “Sirli bog‘” seriallari qahramoni) ijro etgan.
Izoh (0)