Kulgidan o‘zingizni tiyolmaysiz: Koreyaning eng kulgili 4 ta seriali

Quyida eng yengil komedik seriallarni taqdim etamiz. Shunchaki barcha muammolaringizni unuting va vaqtingizni maroqli o‘tkazing.

“Vaykiki mehmonxonasi”

Uch yigitning kino sohasidagi ambitsiyalarini amalga oshirish uchun mehmonxona biznesida pul ishlashga urinishlari haqidagi hikoya. Ular to‘g‘ridan to‘g‘ri tayyor jamoa — rejissyor, aktyor, ssenariynavis. Rejissyorning hayotida doimiy muammolar bor, aktyorga faqat bema’ni rollar beriladi, ssenariynavis esa kino olamini zabt etishni orzu qiladi, lekin buning o‘rniga mayda-chuyda ishlar bilan kun ko‘radi.

Har biri buyuk orzularni ko‘radi va bunga erishish uchun ular o‘zlarining “Vaykiki” mehmonxonasini ochishadi. Ammo uchovlon tentak bo‘lgani uchun daromad qila olishmaydi. Mijoz topish ham imkonsiz bo‘lib qoladi, qolaversa, yangi tug‘ilgan chaqalog‘i bilan bir qiz boshpana so‘rab keladi — aynan shu qiz mijozlar bilan bog‘liq vaziyatni yaxshilashda yordam beradi.

“Qirolicha Chorin”

Koreyslar boshqa davrga borishni, ikkinchi imkoniyatlar yoki alternativ tarixlarni hikoya qilishni yaxshi ko‘rishadi.

Ammo bu safar voqealar rivoji o‘zgacha: Janubiy Koreya prezidentining qarorgohida ishlovchi erkak oshpaz o‘tmishga tushib qoladi. Lekin ayol tanasida, aniqrog‘i, Chorin malikasi bo‘lib uyg‘onadi.

Erkak oshpazning malikaga aylangan holda yangi hayotga moslashish jarayonini kuzatish juda qiziqarli. Shu bilan birga, u zamonaviy dunyo bilimlarini o‘tmishda qo‘llay boshlaydi. Yana u eri bo‘lgan qirol bilan muloqot qilishiga to‘g‘ri keladi. Ushbu muloqot serialning asosiy harakatlantiruvchi kuchlaridan biri hisoblanadi.

Serialdagi o‘ziga xos hazil qahramonning zamonaviy dunyoqarashlari bilan Choson davri an’analari o‘rtasidagi kontrast orqali yaratiladi. Malikaning odatiy harakati va gapirishi hayrat, tushunmovchilik, ba’zan esa shokka sabab bo‘ladi.

Ayol (erkak) rolini ijro etgan aktrisa yilning eng yaxshi aktrisalaridan biri sifatida tan olingan. Suratga olish jarayonida aktyorlarga ham improvizatsiya qilishga ruxsat berilgan.

“Qalbing sadosi”

Dorama xuddi shu nomdagi Vebtun (asosan smartfonlarda o‘qish uchun Janubiy Koreyada yaratilgan raqamli komiks turi) asosida yaratilgan bo‘lib, u Koreyada eng uzoq davom etgan va muvaffaqiyatli seriallardan biri hisoblanadi.

Hikoya vebtun rassomi Cho Sok (Li Kvan Su ijro etgan) haqida. U dangasa va no‘noq inson, biroq buyuk rassom bo‘lish orzusida yashaydi. Ammo u qanchalik harakat qilmasin, doimo atrofida tartibsizlik keltirib chiqaradi, hayotini nazorat qilolmaydi va maqsadiga erishish uchun to‘g‘ri yo‘l topa olmaydi. Uning butun oilasi ham, atrofdagilar ham bu tuganmas tartibsizlikka faol hissa qo‘shadi.

Li Kvan Suning ajoyib ijrosi bu hazilni jonli va tabiiy qiladi. Li Kvan Su Janubiy Koreyaning eng yaxshi komediya aktyorlaridan biri hisoblanadi. U “Yugurayotgan erkak” deb nomlangan eng uzoq davom etgan ko‘ngilochar shoulardan biridagi ishtiroki tufayli “Osiyo shahzodasi” nomini olgan.

“Mening yo‘lim”

To‘rt do‘st o‘z orzulari uchun kurashadi. Ularning na puli, na tanishlari bor.

Ko Don Man bir paytlar umidli sportchi edi, ammo hozir oddiy va unchalik obro‘li bo‘lmagan ishda kun kechirmoqda. Shunga qaramay, u ringga qaytib, aralash jang san’ati bo‘yicha karyerasini boshlash istagidan voz kecholmaydi. Uning eng yaxshi dugonasi Chxve E Ra ham zerikarli ishda o‘zini tiqilib qolgandek his qiladi va atrofdagilarning masxarasiga qaramay, teleboshlovchi bo‘lishni orzu qiladi.

Boshqa juftlik – Kim Ju Man va Pak Sol Xi – munosabatlarida muammolarga duch kelishadi. Ju Man ularning munosabatlarini hamkasblaridan yashiradi va turli muammolarga duch keladi, bu esa Sol Xi uchun noqulaylik tug‘diradi.

Doramadagi asosiy mavzular: do‘stlik va muhabbat. Ammo bu mavzular rivoji asosan hazil va noqulay vaziyatlar orqali ochib beriladi, masalan, Don Manning sportdagi mahoratini tiklashga urinishlari yoki E Raning televizion olamda o‘zini ko‘rsatishdagi muvaffaqiyatsiz harakatlari.

Bundan tashqari, doramada Janubiy Koreyada yoshlar duch keladigan hayotdagi real qiyinchiliklar tasvirlanadi:

• moliyaviy qiyinchiliklar,
• karyeradagi umidsizliklar,
• jamiyat bosimi.

“Mening uchinchi darajali yo‘lim” syujet jihatidan “Vaykiki mehmonxonasi”ga o‘xshaydi, lekin mazkur film yanada real voqealarga boy. Unda yurakni o‘rtaydigan, romantik lahzalar va yashashga ilhom beradigan, taslim bo‘lmaslikka undovchi vaziyatlar bor.