Angliyalik hujumchi, hozirda Germaniyaning “Bavariya” klubi sharafini himoya qilayotgan Harri Keyn tumanli Albionga qaytishi mumkin. DeadlineDayLive nashrining xabariga ko‘ra, “Manchester Yunayted” 32 yoshli forvardni o‘z safiga qo‘shib olishni istamoqda.
Manbaga ko‘ra, Harri Keyn bilan “Bavariya” o‘rtasidagi shartnomada maxsus band mavjud. Ya’ni, agar futbolchi boshqa jamoaga o‘tishni istasa, Myunxen klubi bunga to‘sqinlik qila olmaydi. “Qizil iblislar” esa aynan shu bandni faollashtirish orqali hujumchini qo‘lga kiritishni rejalashtirgan. Keyn “nemis mashinasi” safini tark etmoqchi bo‘lsa, xaridor klub uni 65 million yevro evaziga sotib olishi kerak bo‘ladi.
Avvalroq Kataloniyaning “Barselona” klubi ham Harri Keynni 2026-yilda sotib olishni rejalashtirayotgani haqida xabarlar tarqalgan edi. Xabarlarga ko‘ra, “ko‘k-anorranglilar” ustozi hujum chizig‘ini kuchaytirish uchun ingliz futbolchisining nomzodini ilgari surgan.
Ma’lumot uchun, Harri Keyn uchun Angliya Premyer Ligasi begona emas. U bunga qadar Londonning “Tottenhem” klubi sharafini himoya qilgan va 2023-yil yozida “shporlar” safidan “Bavariya”ga transfer qilingandi.
- Harri Keyn 2024/25-yilgi mavsumda “Bavariya” safida jami 51 o‘yinda maydonga tushib, 41 gol va 14 golli uzatmaga mualliflik qilgan.
- Transfermarkt portali uning qiymatini 75 million yevroga baholamoqda.
- Keynning “Bavariya” bilan amaldagi shartnomasi 2027-yil yozigacha mo‘ljallangan.
Izoh (0)