“Garri Potter” olamida yana bir syujetga oid xatolik aniqlandi, bu esa ba’zi voqealarning mantiqiyligini shubha ostiga qo‘ymoqda. Ayniqsa, “G‘aroyib maxluqlar: Grindelvald jinoyatlari” filmining syujeti “Garri Potter” haqidagi voqealarning prikveli bo‘lganligi sababli bu holat ko‘plab savollarni keltirib chiqardi.
Foto: Screen Rant
Filmdagi voqealar 1927-yilda sodir bo‘ladi. Unda tomoshabin “Garri Potter” davridagi eng mashhur qahramonlardan biri — professor Minerva Makgonagallning yoshligini ko‘rish imkoniga ega bo‘ladi.
Syujet bo‘yicha transfiguratsiya fani o‘qituvchisi Xogvarts sehrgarlik maktabida allaqachon ishlay boshlaydi. Filmda aktrisa o‘z pedagogik faoliyatini endigina boshlayotgan yosh qiyofada tasvirlanadi.
Biroq “Garri Potter” olamining e’tiborli va ashaddiy muxlislari ikkala filmdagi sanalarni solishtirib, muhim bir savolni o‘rtaga tashlashdi: Minerva Makgonagall qanday qilib Xogvartsda dars bera olgan, axir u o‘sha yilda hali tug‘ilmagan edi-ku?!
Foto: Screen Rant
Gap shundaki, professorning tug‘ilgan sanasi kitobda aniq ko‘rsatilgan: Minerva Makgonagall 1935-yilda dunyoga kelgan. Shu sababli u “G‘aroyib maxluqlar: Grindelvald jinoyatlari” filmidagi voqealar paytida Xogvartsda dars berishi imkonsiz edi, chunki bo‘lajak professor hali dunyoga kelmagan bo‘lar edi.
Mazkur xatolikni “vaqt aylantirgich” uskunasi yordamida ham tushuntirib bo‘lmaydi. Makgonagallning vaqt bo‘ylab sayohat qilishi uchun u avvalo tug‘ilgan bo‘lishi kerak edi. Prikvel mualliflari esa bu xatolikka hech qanday rasmiy izoh bermagan.
Eslatib o‘tamiz, professor Makgonagall rolini ijro etgan britaniyalik aktrisa Meggi Smit 27-sentyabr kuni 89 yoshda olamdan o‘tdi.
Izoh (0)