Yaponiya salkam 300 ming odamning o‘limiga olib kelishi mumkin bo‘lgan kuchli zilzilaga tayyorlanmoqda. Bu haqda Reuters xabar berdi.
Yaponiya iqtisodiyoti Tinch okeani sohilida uzoq kutilgan megazilzila yuz bergan taqdirda 1,81 trillion dollargacha zarar ko‘rishi mumkin. Bundan tashqari, ehtimoliy zilzila sunamini keltirib chiqarishi, yuzlab binolar vayron bo‘lishi kutilmoqda.
Yaponiya dunyodagi eng seysmik xavfli davlatlardan biri bo‘lib, hukumat 8-9 balli zilzila ehtimolini taxminan 80 foiz deb baholamoqda. U Nankay yoriq zonasida yuz berishi prognoz qilingan.
Eng yomon ssenariyga ko‘ra, ushbu hududda 9 magnitudali zilzila sodir bo‘lsa, bir milliondan ortiq odam yoki Yaponiya umumiy aholisining 1 foizini evakuatsiya qilishga to‘g‘ri keladi. Agar zilzila qishda kech tunda sodir bo‘lsa, sunami va binolarning qulashi oqibatida 298 minggacha odam halok bo‘lishi mumkin.
Bunga qadar eng yomon ssenariyda qurbonlar soni 320 mingdan, jabrlanganlar soni esa 620 mingdan oshishi mumkin, deb hisoblanardi. Ushbu prognoz 10 yildan ortiq vaqt oldin berilgan. Shundan so‘ng joylarning topografiyasi haqidagi aniqroq ma’lumotlarni hisobga olgan holda hisoblash usullari o‘zgardi.
Nankay botig‘i Yaponiyaning Tinch okeaniga tutash janubi-g‘arbiy qirg‘og‘ida joylashgan bo‘lib, taxminan, 900 kilometr masofaga cho‘zilgan. Bu yerda Filippin dengiz plitasi Yevrosiyo plitasi ostiga cho‘kmoqda. To‘planib borayotgan tektonik kuchlanishlar har 100-150 yilda bir marta kuchli zilzilalarga sabab bo‘ladi.
Yaponiya 2024-yili tarixda birinchi marta megazilzila haqida ogohlantirish e’lon qilgandi, o‘shanda 9 magnitudali zilzilaning “nisbatan yuqori ehtimoli” borligi aytilgan.
2011-yilda Yaponiyaning shimoli-sharqida sodir bo‘lgan 9 balli zilzila vayronkor sunami va Fukusima atom elektr stansiyasidagi uchta reaktorning erishiga sabab bo‘lib, 15 mingdan ortiq kishining hayotiga zomin bo‘ldi.
Ma’lumot o‘rnida, 28-mart kuni Myanmada kuchli zilzila yuz berdi, uning ta’siri Tailand va Xitoyda ham sezildi. Hodisa oqibatida Myanmada 2700 dan ortiq odam halok bo‘ldi, Tailandda ham qurbonlar qayd etildi.
Izoh (0)