Япония салкам 300 минг одамнинг ўлимига олиб келиши мумкин бўлган кучли зилзилага тайёрланмоқда. Бу ҳақда Reuters хабар берди.
Япония иқтисодиёти Тинч океани соҳилида узоқ кутилган мегазилзила юз берган тақдирда 1,81 триллион долларгача зарар кўриши мумкин. Бундан ташқари, эҳтимолий зилзила цунамини келтириб чиқариши, юзлаб бинолар вайрон бўлиши кутилмоқда.
Япония дунёдаги энг сейсмик хавфли давлатлардан бири бўлиб, ҳукумат 8-9 балли зилзила эҳтимолини тахминан 80 фоиз деб баҳоламоқда. У Нанкай ёриқ зонасида юз бериши прогноз қилинган.
Энг ёмон сценарийга кўра, ушбу ҳудудда 9 магнитудали зилзила содир бўлса, бир миллиондан ортиқ одам ёки Япония умумий аҳолисининг 1 фоизини эвакуация қилишга тўғри келади. Агар зилзила қишда кеч тунда содир бўлса, цунами ва биноларнинг қулаши оқибатида 298 минггача одам ҳалок бўлиши мумкин.
Бунга қадар энг ёмон сценарийда қурбонлар сони 320 мингдан, жабрланганлар сони эса 620 мингдан ошиши мумкин, деб ҳисобланарди. Ушбу прогноз 10 йилдан ортиқ вақт олдин берилган. Шундан сўнг жойларнинг топографияси ҳақидаги аниқроқ маълумотларни ҳисобга олган ҳолда ҳисоблаш усуллари ўзгарди.
Нанкай ботиғи Япониянинг Тинч океанига туташ жануби-ғарбий қирғоғида жойлашган бўлиб, тахминан, 900 километр масофага чўзилган. Бу ерда Филиппин денгиз плитаси Евросиё плитаси остига чўкмоқда. Тўпланиб бораётган тектоник кучланишлар ҳар 100-150 йилда бир марта кучли зилзилаларга сабаб бўлади.
Япония 2024 йили тарихда биринчи марта мегазилзила ҳақида огоҳлантириш эълон қилганди, ўшанда 9 магнитудали зилзиланинг “нисбатан юқори эҳтимоли” борлиги айтилган.
2011 йилда Япониянинг шимоли-шарқида содир бўлган 9 балли зилзила вайронкор цунами ва Фукусима атом электр станциясидаги учта реакторнинг эришига сабаб бўлиб, 15 мингдан ортиқ кишининг ҳаётига зомин бўлди.
Маълумот ўрнида, 28 март куни Мьянмада кучли зилзила юз берди, унинг таъсири Таиланд ва Хитойда ҳам сезилди. Ҳодиса оқибатида Мьянмада 2700 дан ортиқ одам ҳалок бўлди, Таиландда ҳам қурбонлар қайд этилди.
Изоҳ (0)