Kecha, 28-mart kuni Myanmada yuz bergan zilzila qurbonlari mingdan ortdi. Bu so‘nggi yillardagi eng halokatli tabiiy ofat hisoblanadi. Harbiylar nazoratidagi hukumat xorijlik qutqaruvchilar uchun mamlakatga kirishga ruxsat berdi.
7,7 magnitudali zilzila usiz ham fuqarolar urushi domida qolgan mamlakatda ko‘priklar, aeroportlar va boshqa infratuzilmaga jiddiy zarar yetkazdi. Seysmologlarga ko‘ra, bu 1946-yildan beri mamlakatda sodir bo‘lgan eng kuchli zilzila hisoblanadi. Uning episentri Myanmaning ikkinchi yirik shahri Mandalay g‘arbida bo‘lgan. Silkinish to‘lqinlari poytaxt Neypido va boshqa yirik shaharlarda ham sezilgan.
Avvaliga 144 kishi halok bo‘lgani haqida xabar qilingandi. Biroq hokimiyatni to‘ntarish yo‘li bilan o‘z qo‘liga olgan Min Aun Xlayn Mandalayga kelgach, qurbonlar soni keskin oshgani ma’lum qilindi. Qutqaruv texnikalarining yetishmasligi sabab vayronalar ostidagi odamlarni qo‘l bilan qazib chiqarishga to‘g‘ri kelmoqda. Shu bois harbiy xunta favqulodda holat e’lon qilib, xalqaro hamjamiyatdan yordam so‘radi.
Tabiiy ofat natijasida Mandalay va Neypido xalqaro aeroportlari jiddiy zarar ko‘rgan. Neypidoda dispetcherlik minorasi qulab tushib, kamida yetti kishi, jumladan, dispetcher, uning yordamchilari va harbiy razvedka ofitserini hayotdan olib ketgan.
Zilzila ta’siri qo‘shni mamlakatlarda ham sezildi. Tailand poytaxti Bangkokda qurilishi tugallanmagan 30 qavatli bino qulab tushgan. Hozirgacha 10 kishi halok bo‘lgani, 16 kishi jarohatlangani va 101 kishi bedarak yo‘qolgani xabar qilinmoqda.
Halokatning ko‘lami va prognozlar
AQSH Geologik xizmati (USGS) hisob-kitoblariga ko‘ra, Myanmada qurbonlar soni 10 000 nafardan oshishi, yo‘qotishlar esa mamlakatning yillik iqtisodiy ishlab chiqarish hajmidan ko‘proq bo‘lishi mumkin.
Myanma muxolifati — harbiy to‘ntarishdan so‘ng tuzilgan Milliy birlik hukumatining ma’lum qilishicha, zilzila oqibatida kamida 2 900 ta bino, 30 ta yo‘l va 7 ta ko‘prik zarar ko‘rgan.
Myanma armiyasi 2021-yilda davlat to‘ntarishini amalga oshirganidan so‘ng, mamlakatda fuqarolar urushi boshlandi va hanuz davom etmoqda.
Izoh (0)