Myanmada 28-mart kuni yuz bergan 7,7 va 6,4 balli kuchli zilzilalar oqibatida halok bo‘lganlar soni 1700 kishiga yetdi. Bu haqda Anadolu xabar berdi.
Yer silkinishlari oqibatda jarohatlanganlar soni 3400 nafarni tashkil etmoqda. Mamlakat harbiy ma’muriyati 300 kishi hamon bedarak yo‘qolgan deb hisoblanayotganini ma’lum qildi.
Tailand poytaxti Bangkokda esa qurbonlar soni 17 kishiga yetdi. Jarohatlanganlar 32 kishini tashkil etmoqda, 83 kishi bedarak yo‘qolgan. Qutqaruv xizmatlari qidiruv ishlarini davom ettirmoqda. Tailand tabiiy ofatlarning oldini olish va oqibatlarini bartaraf etish agentligi qo‘shni Myanmada sodir bo‘lgan kuchli zilzila oqibatida mamlakatda katta vayronagarchiliklar yuzaga kelganini ma’lum qildi.
Jumladan, 420 ta turar-joy binosi, 48 ta ibodatxona, 76 ta kasalxona, shuningdek, o‘nlab maktablar va davlat muassasalari zarar ko‘rgan. Qutqaruv xizmatlari yetkazilgan zararni baholash va tiklash ishlarini davom ettirmoqda.
Myanma va Tailanddan tashqari, zilzilalar Xitoyning Yunnan provinsiyasining ba’zi hududlarida vayronagarchiliklarga olib keldi. Qurbonlar va jabrlanganlar haqida hozircha ma’lumot berilmagan. Myanma harbiy ma’muriyati zilzila munosabati bilan xalqaro yordam so‘raganidan so‘ng, mamlakatlar (Xitoy, Rossiya va Hindiston ham) yordam ko‘rsatish uchun qutqaruv guruhlari va materiallarni yubora boshladi.
BMT Myanmaga zilziladan keyin yordam ko‘rsatish uchun 5 million dollar ajratdi. Zilzila shundoq ham 20 million kishi yordamga muhtoj bo‘lgan Myanmadagi gumanitar vaziyatni yanada og‘irlashtiradi.
Izoh (0)