Xitoy tarkibidagi Tibet avtonom hududida yuz bergan 6,8 magnitudali zilzila oqibatida qurbonlar soni 120 kishidan oshib ketdi. Bu haqda Sky news xabar berdi.
Ma’lum qilinishicha, tabiiy ofat oqibatida 188 kishi jarohatlangan. Mingdan ortiq bino zarar ko‘rgan. Hodisa joyida bir yarim ming nafar qutqaruvchi ishlamoqda. Xitoy hukumati vayron bo‘lgan hududlar aholisiga yordam berish uchun 13,5 million dollardan ortiq mablag‘ ajratdi.
Xitoyning raisi Si Szinpin yaradorlarga tibbiy yordam ko‘rsatish uchun barcha imkoniyatlarni ishga solishni buyurdi. U ikkilamchi ofatlarning oldini olish, jabrlanganlarni joylashtirish ishlarini to‘g‘ri tashkil etish va zilzila oqibatlarini bartaraf etish ishlarini sifatli olib borishga chaqirdi.
Seysmologik vaziyat ustidan nazoratni kuchaytirish va uni barvaqt ogohlantirish, qutqaruv ishlari uchun materiallarni o‘z vaqtida yetkazib berish, shikastlangan infratuzilma inshootlarini tiklashni tezlashtirish, aholiga zaruriy asosiy hayotiy sharoitlarni ta’minlash kerak, toki odamlar qishni xavfsiz va issiq o‘tkazishlari mumkin bo‘lsin, dedi u.
Xitoydagi zilzila
Tibetda 7-yanvar kuni 6,8 balli (AQSH geologiya xizmati hisob-kitoblariga ko‘ra 7,1 magnitudali) zilzila qayd etildi. Yer silkinishlari Nepal, Butan va Shimoliy Hindistonda ham sezildi.
Xitoyning janubi-g‘arbiy qismlarida tez-tez zilzila kuzatiladi. 2008-yilda Sichuan provinsiyasida sodir bo‘lgan kuchli zilzila oqibatida 70 mingga yaqin kishi halok bo‘lgandi.
So‘nggi besh yil ichida Shigatse zilzilasidan 200 km uzoqlikda uch yoki undan ortiq magnitudali 29 ta zilzila qayd etilgan. 2015-yilda qo‘shni Nepaldagi Katmandu yaqinida 7,8 magnitudali zilzila sodir bo‘lgandi, bu mamlakatda kuzatilgan eng dahshatli zilzilada 9000 ga yaqin odam halok bo‘lgan va minglab odamlar jarohatlangan. Shavkat Mirziyoyev zilzila yuzasidan Si Szinpinga ta’ziya yo‘lladi. Davlat rahbari halok bo‘lganlarning oila a’zolari va yaqinlariga hamdardlik bildirdi, jabrlanganlar tez orada shifo topishini tiladi.
Izoh (0)