Turkiya prezidenti Rajab Toyyib Erdo‘g‘on Egey dengizi hududida tez-tez sodir bo‘layotgan zilzilalar tufayli Istanbul va mamlakatning boshqa viloyatlarida yuz berishi mumkin bo‘lgan favqulodda vaziyatlarga jiddiy tayyorgarlik ko‘rishga chaqirdi.
Uning aytishicha, mahalliy ma’muriyatlar bu masalaga tegishli e’tibor qaratishlari va shahar muhitini o‘zgartirish loyihalari orqali shaharlarni ehtimoliy zilzilalarga tayyorlashlari zarur.
Erdo‘g‘on “Turkiya shaharlarini, ayniqsa Istanbulni zilzilabardosh qilishdan boshqa chora yo‘q”ligini ta’kidladi.
Avvalroq muhandis-geofiziklar palatasining Izmir bo‘limi rahbari Sinandjan Ozicher Turkiyaning kurort mintaqasida, ayniqsa Izmirda vayron qiluvchi zilzila xavfi borligini, bu shahar Istanbulga qaraganda ko‘proq xavf ostida ekanligini ma’lum qilgan edi.
Ozicherning ta’kidlashicha, Izmirdagi qalinligi 120 metrgacha bo‘lgan allyuvial grunt seysmik to‘lqinlarning amplitudasini kuchaytiradi, bu esa binolarni yanada zaiflashtiradi. Shuningdek, u mintaqada 20—22 soniya davom etadigan 6,9 ball kuchidagi zilzila sodir bo‘lishi mumkinligini bashorat qilmoqda.
Joriy yilning 22-yanvar kuni Turkiya qirg‘oqlarida 5,0 magnitudali zilzila qayd etildi. Tabiiy ofat markazi 243 mingga yaqin aholi istiqomat qiladigan Manisa shahridan 135 km shimoli-g‘arbda joylashgan.
Izoh (0)