O‘zbekistonda 2024-yilda tarmoqqa uzatilgan elektr energiyasini sotishdan tushgan tushum 4 053 mlrd so‘mni tashkil etgani ma’lum qilindi.
AOKAda “O‘zbekgidroenergo”AJ rahbariyati ishtirokida o‘tkazilgan matbuot anjumanida 2024-yil davomida amalga oshirilgan ishlar hamda 2025-yildagi rejalar haqida ma’lumot berildi. Jamiyat tomonidan bugungi kunga qadar umumiy quvvati 430 MVtga teng bo‘lgan 55 ta GES foydalanishga topshirildi.
Shundan 42 ta yangi GES qurilgan bo‘lsa, 13 ta mavjud GES zamonaviy talablar asosida to‘liq modernizatsiya qilindi. 2024-yil yakunlari bilan jamiyatning umumiy aktivlari qiymati ilk bor 1 mlrd 200 mln dollarga yetkazildi. 2017-yil bilan taqqoslanganda, jami aktivlar qiymati 4 barobarga oshdi.
2024-yilda tizimdagi energiya hosil qiluvchi korxonalar tomonidan 8,2 mlrd kVt-soat elektr energiyasi ishlab chiqarildi. “O‘zbekgidroenergo” AJ milliy elektr tarmoqlariga elektr energiyasini yetkazib berish asnosida, yirik soliq to‘lovchi sifatida o‘tgan yilning o‘zida davlat byudjetiga qariyb 1 trillion so‘mlik soliq va boshqa to‘lovlarni amalga oshirdi.
“O‘zbekgidroenergo” AJ tomonidan joriy 2025-yilda quyidagi asosiy yo‘nalishlar bo‘yicha ustuvor vazifalarni amalga oshirish maqsad etib belgilangan:
- 2025-yilda elektr energiyasi ishlab chiqarishda o‘tgan yilga nisbatan 10 foiz o‘sish sur’atiga erishish;
- Investitsiya dasturiga asosan umumiy 3,3 mlrd dollarga teng 14 ta loyihani amalga oshirish;
- umumiy quvvati 222 MVt, yillik ishlab chiqarishi 1 mlrd kVt-soatga teng 38 ta loyihani foydalanishga topshirish.
O‘zbekistonda 2025-yil energetika korxonalari uchun tejamkorlik va samaradorlik yili bo‘ladi. Elektr energiyasi ishlab chiqarish, uzatish va taqsimlash jarayonlari alohida kompaniyalarga ajratilib, investitsiya uchun imkoniyatlar yaratildi. Oxirgi besh yilda elektr energiyasi ishlab chiqarishga 4 milliard 300 million dollar investitsiya kirib keldi hamda 5,7 gigavatt yangi quvvatlar yaratildi.
Izoh (0)