Amerikalik oila muzli ko‘lga qulab tushgan samolyotning qanotida 12 soat o‘tirib, aviahalokatdan omon qoldi. Bu haqda New York Post xabar bermoqda.
Guvohlar va qutqaruvchilarning so‘zlariga ko‘ra, Alyaskadagi Tustumen ko‘li o‘rtasida 38 yoshli uchuvchi va uning ikki qizi Piper PA-12 Super Cruiser samolyotining qanotida omon qolishgan. Ularni ko‘ngilli uchuvchi Terri Godes topishga muvaffaq bo‘lgan. U izlanishlar davomida faqat samolyot parchalari qolganini ko‘rish umidida bo‘lganini tan oldi va tirik qolgan oilani ko‘rib xursand bo‘lganini aytgan.
“Buni ko‘rib, yuragim ezilib ketdi. Lekin yaqinlashib, pastga tushganimda, samolyot qanotida uch kishi borligini ko‘rdim. Yaqinlashayotganimda ularni tirik ko‘rish maqsadida duolar qilayotganimda, ularning qo‘llarini silkitayotganini ko‘rdim”, dedi u Associated Press agentligiga bergan intervyusida.
Godes boshqa ko‘ngilli uchuvchilarga topilma haqida xabar bergan va hamkasbi, aviator Deyl Eyxerni Alyaska shtat politsiyasi bilan bog‘lanishga undagan.
Kenay yarim oroli bo‘ylab sayohatga chiqqan oila halokat joyidan Alyaska Milliy gvardiyasi vertolyoti yordamida qutqarilib, xavfsiz joyga olib ketilgan.
207-aviatsiya polki qo‘mondoni, podpolkovnik Brendon Xolbrukning so‘zlariga ko‘ra, qizlar nisbatan quruqroq bo‘lgan, uchuvchini esa biroz sovuq yegan.
Rasmiy ma’lumotlarga ko‘ra, uch kishidan hech biri hayot uchun xavfli jarohat olmagan.
Izoh (0)