Fransiya sharqidagi Sen-Dizye aviabazasi hududida ikkita Alpha Jet yengil samolyotlari to‘qnashib ketdi. Bu haqda Havo-kosmik kuchlari bayonotiga tayanib, AFP xabar berdi.
Hodisa 25-mart kuni “Patrul de Frans” uchuvchilar guruhi bilan sodir bo‘lgan. Ikki hujumchi samolyotining to‘qnashuvi mashg‘ulotlar paytida yuz bergan, dedi Fransiya qurolli kuchlari vaziri Sebastyan Lekornyu. Ikkala uchuvchi va samolyotlardan birining yo‘lovchisi katapulta qilishga muvaffaq bo‘lgan. Ular yengil jarohat olgan.
Ma’lum qilinishicha, samolyotlardan biri o‘rmonda, ikkinchisi esa mahalliy sement zavodi hududida qulagan. Guvohlarning so‘zlariga ko‘ra, korxonada yong‘in kelib chiqqan, tez orada u o‘chirilgan. Hozirda aviahalokat sabablarini aniqlash uchun tergov ishlari davom etmoqda.
Fevral oyida AQSHda samolyotlar to‘qnashishi bilan bog‘liq ikkita hodisa kuzatilgan edi. Ulardan biri 11-fevral kuni kuzatilgan, Bombardier Learjet samolyoti aeroportga qo‘nganidan so‘ng uchish-qo‘nish yo‘lagidan chiqib ketgan.
U xususiy hududda to‘xtab turgan Gulfstream 2100 biznes-jetiga borib urilgan. Hodisa oqibatida uch kishi jarohat olib, shifoxonaga yotqizilgan, bir kishi esa davolanishdan bosh torgan. Samolyotlardan birida bir kishi qamalib qolgan. Hodisa oqibatida kamida bir kishi halok bo‘lgandi.
Ikkinchi hodisa 19-fevralda yuz bergan. AQSHning Arizona shtati osmonida kichik samolyotlar to‘qnashishi oqibatida ikki kishi halok bo‘lgan. Fransiyada esa 2024-yilning yozida ikkita qiruvchi samolyot halokatga uchragan edi.
Izoh (0)