Farg‘ona xalqaro aeroportida 12-mart kuni Novosibirskdan S7-5561 reysi bilan uchgan S7 Airlines aviakompaniyasining Boeing 737-800 samolyoti uchish-qo‘nish yo‘lagida qolib ketdi.
“Aviatorshina” Telegram kanalining yozishicha, samolyot qo‘ngandan so‘ng, uchish-qo‘nish yo‘lagida harakatlanayotganda chap asosiy shassidagi tashqi g‘ildirak bloklanib qolgan, keyin esa chiqib ketgan. Samolyot komandiri samolyotni to‘xtatib, muhandis-texnik xodimlarni chaqirgan. Samolyotni ko‘zdan kechirish chog‘ida g‘ildirakni ushlab turuvchi murvatlardan bir qanchasi yetishmayotgani aniqlangan.
Bortda bo‘lgan 160 nafar yo‘lovchi uchish-qo‘nish yo‘lagiga tushirilib, yuklari bilan birga aeroport terminaliga yetkazilgan va ular aviakompaniyaning zahiradagi samolyoti bilan manzilga yetkazilishga qaror qilingan.
Boeing 737 samolyoti esa parvozdan chetlatilgan va bir necha soatdan keyin perronga olib borilgan.
“RBK” nashrining ma’lum qilishicha, Novosibirsk transport prokuraturasi S7 Airlines samolyoti bilan yuz bergan holat yuzasidan tergov boshladi. Ayni paytda mutaxassislar yuzaga kelgan texnik nosozlik sabablarini o‘rganmoqda. Aviakompaniya hozircha vaziyatga izoh bermadi.
5-mart kuni Moskvaning Vnukovo aeroportidan Toshkentga uchayotgan samolyot dvigateli teletrap sababli shikastlangandi. Moskva transport prokuraturasi ushbu hodisaning barcha holatlariga oydinlik kiritgach, aeroport xodimlarining xatti-harakatlariga huquqiy baho berishi, asoslar mavjud bo‘lsa, chora ko‘rishi bildirilgan.
Izoh (0)