AQSHning Kaliforniya shtatida samolyot tijorat binosiga qulashi oqibatida ikki kishi halok bo‘ldi, 18 kishi jarohatlandi. Bu haqda BBC xabar berdi.
O‘n kishi tan jarohati bilan shifoxonaga yetkazilgan. Qolgan 8 kishi yordam ko‘rsatilgach, qo‘yib yuborilgan. Federal Aviatsiya ma’lumotlariga ko‘ra, bir dvigatelli Van’s RV-10 samolyoti halokatga uchragan. Rasmiylar halokat qanday sodir bo‘lgani haqida qo‘shimcha ma’lumot bermagan. Halok bo‘lgan ikki kishi ishchi bo‘lganmi yoki samolyot bortidagilarmi, noma’lum.
Politsiya hududdagi binolardan odamlarni evakuatsiya qilmoqda va halokat sodir bo‘lgan joydan uzoqroqda turishni so‘ramoqda.
Kongressmen Lou Korrea samolyot qulagan bino mebel ishlab chiqarish biznesi ekanini aytdi. U jarohatlanganlarning aksariyati zavod ishchilari bo‘lganini ta’kidladi. Aviahalokat oqibatida yong‘in ham kelib chiqqan va u o‘t o‘chiruvchilar tomonidan o‘chirilgan.
Bu so‘nggi ikki oy ichida hududda halokatga uchragan ikkinchi samolyotdir. 25-noyabr kuni yana bir samolyot aviahalokat yuz bergan hududdan taxminan bir blok uzoqlikda daraxtga qulab tushgandi. Ushbu halokatda jiddiy jarohatlar qayd etilmagan.
Bu samolyot ishtirokida 10 kun ichida yuz bergan beshinchi xavfli hodisadir. Avvalgilari:
♦ 25-dekabr kuni Qozog‘istonning Oqtov shahrida yuz berdi. Ozarbayjon samolyoti qulashi oqibatida 38 kishi halok bo‘ldi, 29 kishi omon qoldi. Aviatexnika ko‘zdan kechirilganida teshiklar aniqlandi. Ozarbayjon prezidenti samolyot Grozniy yaqinida o‘qqa tutilgani, bu samolyotni ishdan chiqarganini aytdi. Ilhom Aliyev Rossiyadan uzr so‘rash, aybdorlarni jazolash va kompensatsiya to‘lashni talab qildi.
♦ 29-dekabr kuni Janubiy Koreyada Bangkokdan Muanga parvoz qilayotgan Jeju Air aviakompaniyasining Boeing 737-800 samolyoti belgilangan aeroportga qo‘nayotganda yonib ketdi. Hodisa oqibatida 179 kishi halok bo‘ldi, ikki kishi omon qoldi. Holat yuzasidan Koreyada 7 kunlik motam e’lon qilindi.
♦ 29-dekabr kuni Boeing 737-800 samolyoti Oslo shahriga favqulodda qo‘nishni amalga oshirdi. Amsterdamga uchayotgan samolyot gidravlikasida nosozlik yuz bergan. Samolyot Oslo aeroportiga qo‘nish chog‘ida uchish-qo‘nish yo‘lagidan chiqib ketib, o‘tlar ustida to‘xtagan. OAV hech kim jabrlanmagani, yo‘lovchilar evakuatsiya qilingani haqida yozmoqda.
♦ 29-dekabr kuni BAAda Jazirah Aviation Club aviakompaniyasiga tegishli yengil motorli samolyot dengizga qulab tushdi. Aviahalokat oqibatida uchuvchi va hamrohi halok bo‘lgan.
Izoh (0)