Harbiy sirlar, jumladan qiruvchi samolyotlarga doir maxfiy ma'lumotlarni xorijlik agentlarga sotgan xitoylik muhandis o‘limga hukm qilindi. Bu haqda Xitoy Davlat xavfsizligi vazirligiga tayanib South China Morning Post xabar bermoqda.
Ma’lum qilinishicha, Liu familiyali muhandis tadqiqot institutida ishlagan vaqti maxfiy hujjatlarni noqonuniy ravishda nusxalab, keyinchalik ularni xorijiy razvedka agentlariga sotgan. Vazirlikning ta’kidlashicha, Liu bunga ish joyidagi adolatsizlikdan norozi bo‘lgani sabab qo‘l urgan.
Shundan so‘ng u investitsiya kompaniyasiga ishga kirib, qimmatli qog‘ozlar bilan savdo qila boshlagan. Biroq moliyaviy muammolar sabab katta qarzga botib qolgan. Bu esa uni davlat sirlarini sotishga undagan. Liu bir necha SIM-karta sotib olib, turli taxalluslar ostida faoliyat yuritgan hamda shu orqali xorijiy razvedka agentligi bilan bog‘langan. Biroq agentlik maxfiy ma’lumotlarni arzon narxda sotib olib, keyin Liu bilan aloqani uzib qo‘ygan.
"Ammo Liu o‘z harakatlarining jiddiyligini anglamadi. Uning "o‘yinqaror mentaliteti" yanada murakkab usullarni ishlab chiqishga undagan", — deyiladi vazirlik bayonotida.
Muhandis keyingi olti oy davomida bir necha mamlakatga sayohat qilib, maxfiy hujjatlarni sotishda davom etgan. Bu esa davlat sirlarining keng miqyosda oshkor bo‘lishiga olib kelgan. Liuga nisbatan o‘lim jazosi hukmi chiqarildi. Biroq uning qachon ijro etilishi noma'lum.
"Liu keysi" Xitoy yaqin tarixidagi yagona keys emas. 2015-yili xorijiy razvedka agentligiga davlat sirlarini sotgan olim Huang Yu hibsga olinib, 2016-yilda qatl etilgan edi.
Izoh (0)