GSMA M360 Yevrosiyo forumida ZTE kompaniyasining katta vitse-prezidenti Jeyms Chjan sun’iy intellektning raqamli iqtisodiyot rivoji uchun hal qiluvchi o‘rnini ochib berdi. U o‘z nutqida kompaniyaning sun’iy intellekt texnologiyalarini o‘z ekotizimiga chuqur integratsiya qilish strategiyasini batafsil tushuntirib, bu texnologik imkoniyatlar va mahsulotlar samaradorligini sezilarli darajada oshirishga xizmat qilayotganini ta’kidladi.
ZTE O‘zbekistonning yetakchi telekom-operatorlari bilan 5G tarmoqlarini qurish va mamlakatni raqamli transformatsiya qilish sohalarida uzoq muddatli strategik hamkorlikni davom ettirmoqda. “Raqamli O‘zbekiston 2030” dasturini qo‘llab-quvvatlash maqsadida kompaniya chekka va borish qiyin bo‘lgan hududlarda mobil aloqa tarmoqlarini kengaytirish loyihalarini amalga oshirib, mamlakatimiz aholisi uchun raqamli xizmatlardan foydalanish imkoniyatlarini yanada kengaytirmoqda.
2025-yilning 21–22-may kunlari Toshkentda O‘zbekiston Respublikasi Raqamli texnologiyalar vazirligi va VEON ko‘magida GSMA M360 Yevrosiyo forumi bo‘lib o‘tmoqda. Tadbir axborot texnologiyalari va telekommunikatsiya sohasidagi yetakchi kompaniyalarni birlashtirib, mintaqada raqamli transformatsiyani jadallashtirish uchun zarur bo‘lgan tashabbuslar, investitsiyalar va hamkorliklarni muhokama qilish maydoniga aylandi. Forum doirasida sun’iy intellekt, 5G va boshqa ilg‘or mobil texnologiyalarni joriy etish, malakali kadrlar tayyorlash hamda shu kabi choralar iqtisodiy o‘sish va barqarorlikni ta’minlashga xizmat qilishi tahlil qilindi. Tadbir hamkorlaridan biri axborot-kommunikatsiya texnologiyalari sohasidagi yetakchi global uskunalar va integratsiyalashgan texnologik yechimlar yetkazib beruvchisi ZTE Corporation bo‘lib, u sun’iy intellekt raqamli iqtisodiyotni qanday tezlashtirishi va transformatsiya qilishi misollar ko‘rinishida ochib berdi.
Sun’iy intellekt – rivojlanishning dvigateli sifatida
Sun’iy intellektga asoslangan zamonaviy intellektual iqtisodiyot shiddat bilan rivojlanmoqda. IDC xalqaro tadqiqot kompaniyasi prognoziga ko‘ra, sun’iy intellekt 2030-yilga kelib global YAIMni 3,5 foizga oshirishi va ishlab chiqarish, turmush va biznes modellari tubdan o‘zgarishiga turtki bo‘lishi mumkin. GSMA M360 Yevrosiyo forumida ZTE Corporation katta vitse-prezidenti Jeyms Chjan sun’iy intellekt asosidagi innovatsiyalar haqida so‘zlar ekan, intellektual iqtisodiyotdagi tafovutlarni bartaraf etish uchun 5i kontsepsiyasini taklif etdi.
U intellektual iqtisodiyotni uch ustunga (raqamli infratuzilmani yaratish; yangi intellektual biznes-modellarni qo‘llab-quvvatlash; inson manfaatlariga yo‘naltirilgan, axloqiy sun’iy intellekt keng joriy etilishini ta’minlash) tayangan holda rivojlantirish rejasini taqdim etdi. “Sun’iy intellekt — shunchaki texnologiya emas, balki iqtisodiy o‘sish va inklyuziv rivojlanish katalizatoridir”, — deydi Jeyms Chjan. “5i strategiyasi orqali biz turli tarmoqlar uchun yangi qiymat paradigmalarini shakllantiryapmiz. ZTE SI’ning ilg‘or imkoniyatlarini RAN tarmoqlari va intellektual hisoblash infratuzilmasidan tortib, aqlli ishlab chiqarish hamda keyingi avlod qurilmalarigacha butun ekotizimimizga tatbiq etdi”.
Yevrosiyo mintaqasida 5G va sun’iy intellekt integratsiyasini jadallashtirish
Beshinchi avlod aloqa texnologiyalarini joriy etilishi nuqtayi nazaridan, raqamli iqtisodiyot Yevrosiyo mintaqasida ulkan salohiyatga ega. 2024-yilda dunyodagi 5G ulanishlar ulushi 25 foizga yetishi kutilgan bo‘lsa-da, Yevrosiyoda bu ko‘rsatkich bor-yo‘g‘i 1 foizni tashkil qildi. 2030-yilgacha mintaqada 5G ulanishlarini 41 foizga yetkazish uchun hali katta ishlarni amalga oshirish kerak. 5G va SI integratsiyasi ma’lumot uzatish kechikishini kamaytiradi, ma’lumotlarni qayta ishlash samaradorligini oshiradi va SI ilovalari narxlarini pasaytiradi. Bu nafaqat neyrotarmoq va foydalanuvchi o‘rtasida yanada moslashuvchan o‘zaro aloqani ta’minlaydi, balki SI imkoniyatlaridan foydalangan holda, aniq biznes ssenariylariga mos 5G tarmog‘i samaradorligini optimallashtirishga yordam beradi.
“ZTE so‘nggi yillarda Yevrosiyo mamlakatlaridagi eng yirik operatorlar bilan uzoq muddatli strategik hamkorlikni mustahkamlab kelmoqda. Kompaniya sun’iy intellekt innovatsiyalariga tayangan holda, butun mintaqada mobil iqtisodiyot rivojini rag‘batlantirish, yuqori unum va iqtisodiy samaradorlikka ega 5G kompleks mahsulot hamda xizmatlarini taqdim etish, yangi raqamli infratuzilma barpo etish va turli tarmoqlarni raqamli transformatsiya qilishda davlatlarga ko‘maklashishda davom etadi”, — deya ta’kidladi Jeyms Chjan.
Yevrosiyo mamlakatlari raqamlashtirishni ijtimoiy-iqtisodiy rivojlanishning samarali drayveri sifatida qabul qilib, global tendensiyaga qat’iy amal qilmoqda. O‘zbekistonda esa raqamlashtirish bir necha yildan beri keng polosali aloqani kengaytirish, internet tezligini oshirish va mobil aloqa bilan to‘liq qamrovga erishish orqali mamlakatni mintaqaviy axborot texnologiyalari markaziga aylantirishga qaratilgan islohotlar dasturining asosiy yo‘nalishida turibdi. ZTE ushbu maqsadlarni qo‘llab-quvvatlab, ularni amalga oshirishda faol ishtirok etmoqda: kompaniya barcha yirik aloqa operatorlari bilan, jumladan 5G tarmog‘ini qurish va mamlakatni raqamli transformatsiya qilish sohalarida yaqin hamkorlik qiladi.
ZTE “Raqamli O‘zbekiston 2030” kontsepsiyasini tatbiq etish, respublikaning eng olis va yirik infratuzilmasiz hududlarida mobil tarmoqlarni kengaytirish hamda aholiga zamonaviy raqamli xizmatlarni taqdim etish loyihalarini amalga oshirmoqda. Kompaniya, shuningdek, axborot-kommunikatsiya texnologiyalari yo‘nalishidagi yetuk yosh mutaxassislarni tayyorlashga alohida e’tibor berib, O‘zbekistonning yetakchi soha universitetlari bilan hamkorlik qilmoqda.
“Bizningcha, Yevrosiyoning raqamli iqtisodiyoti kelajagi inklyuziv innovatsiyalardadir”, — deya xulosa qildi Jeyms Chjan. “Strategik hamkorliklar, sun’iy intellektga asoslangan yechimlar va mahalliy hamkorlar orqali ZTE mintaqada mutlaqo yangi uzviylik va samaradorlik darajasini ta’minlaydigan infratuzilmani shakllantirishga yordam bermoqda. Mobil tarmoqlarga kiritiladigan investitsiyalar oddiy statistika emas, balki o‘zaro chambarchas, intellektual va teng imkoniyatli jamiyat qurish poydevoridir. Biz barcha hamkorlarni ushbu kelajakni birgalikda yaratishga chorlaymiz”.
Reklama huquqi asosida
Izoh (0)