Sudan armiyasiga tegishli samolyot 25-fevral kuni Omdurman shahri shimolidagi aholi yashaydigan hududda halokatga uchradi. Oqibatda 20 dan ortiq kishi, jumladan, harbiylar va tinch aholi halok bo‘ldi. Bu haqda harbiy va tibbiyot manbalariga tayanib, Al Arabiya xabar berdi.
Sudan armiyasi samolyot aviabazadan ko‘tarilayotgan paytda qulaganini ma’lum qildi. Jabrlanganlar kasalxonaga yetkazilgan. O‘t o‘chiruvchilar halokat joyidagi yong‘inni bartaraf etgan. Hozirda vayronalar ostidan odamlarni qidirish ishlari olib borilmoqda.
Manbalarga ko‘ra, “Antonov” samolyotining qulashiga texnik nosozlik sabab bo‘lgan. Halokat Vadi Seydna aviabazasi yaqinida yuz bergan. Guvohlar samolyot qulagan hududdagi bir nechta uylarga zarar yetganini aytmoqda.
Omdurman shimolida yashovchi aholi halokat oqibatida kuchli portlash sodir bo‘lgani va bu bir qancha mahallalarda elektr ta’minotida uzilishlarga sabab bo‘lganini ta’kidladi. Halok bo‘lganlar orasida Sudanda taniqli brigada generali, Xartum harbiy okrugining sobiq qo‘mondoni Bahor Ahmad ham bor.
Sudandagi vaziyat 2023-yil aprel oyida Suveren kengash (mamlakatning vaqtinchalik boshqaruv organi) raisi, armiya qo‘mondoni Abdul Fattoh al-Burxon va Tezkor harakat kuchlari (TQK) rahbari Muhammad Hamdan Dagalo o‘rtasidagi kelishmovchiliklar tufayli keskinlashdi.
Ular o‘rtasidagi asosiy ziddiyatlar yagona qurolli kuchlarni shakllantirish muddatlari va usullariga, shuningdek, bosh qo‘mondon lavozimini kim egallashi kerakligiga bog‘liq. Al-Burxon bu lavozimga professional harbiy shaxs tayinlanishini yoqlasa, Dagalo esa saylangan fuqaro prezidenti bo‘lishi kerakligini ta’kidlamoqda.
Izoh (0)