Oqtovda halokatga uchragan Embraer 190 yo‘lovchi samolyotida halok bo‘lgan ekipaj a’zolariga vafotidan so‘ng “Ozarbayjonning milliy qahramoni” unvoni berildi. Bu haqda Azerbaijan Airlines aviakompaniyasi ma’lum qildi.
Foto: “Prezident.az”
Ta’kidlanishicha, 29-dekabr kuni Ozarbayjon prezidenti Ilhom Aliyev Boku—Grozniy reysini amalga oshiruvchi “Ozarbayjon havo yo‘llari” yopiq aksiyadorlik jamiyatiga qarashli Embraer 190 yo‘lovchi samolyoti halokatida yuksak professionallik va jasorat ko‘rsatgan shaxslarni mukofotlash to‘g‘risida” farmon qabul qilgan.
Farmon bilan samolyotning halokatga uchrashi chog‘ida xizmat vazifalarini bajarish va yo‘lovchilar hayotini saqlab qolishda ko‘rsatilgan yuksak professionallik, jasorat va fidoiylik uchun uchuvchilar Igor Kshnyakin, Aleksandr Kalyaninov va bortkuzatuvchi Hokuma Aliyevaga vafotidan so‘ng “Ozarbayjonning milliy qahramoni” unvoni bilan, reysning omon qolgan bortkuzatuvchilari Aydan Rahimli va Zulfuqor Asadov esa birinchi darajali “Rashodat” ordeni bilan mukofotlangan.
Oqtov shahrida samolyot halokati: nima yuz berdi?
2024-yil 25-dekabr kuni Oktov aeroportidan uch kilometr uzoqlikda Ozarbayjonning Azerbaijan Airlines (AZAL) aviakompaniyasiga tegishli Embraer 190 samolyoti ishtirokida fojiali aviahalokat yuz berdi. Boku—Grozniy reysini amalga oshirayotgan samolyot favqulodda qo‘nishga urinayotganda halokatga uchradi. Samolyot bortida 62 yo‘lovchi va 5 ekipaj a’zosi bo‘lgan.
Tekshiruv va farazlar
Halokatni tekshirishga Qozog‘iston IKAO konvensiyasiga muvofiq rahbarlik qilmoqda. Ishda Ozarbayjon, Rossiya mutaxassislari, xalqaro ekspertlar va Embraer 190 vakillari ishtirok etmoqda. Qora qutilar olib qo‘yilib, xalqaro ekspertlar ishtirokida tahlil qilinmoqda.
Ozarbayjon ommaviy axborot vositalari, shuningdek, Euronews va Reuters halokat sabablaridan biri sifatida Rossiya havo hujumidan mudofaa vositalarining ishlashi haqidagi taxminlarni muhokama qiluvchi materiallarni e’lon qildi.
28-dekabr kuni Vladimir Putin Rossiya havo hududida fojiali hodisa yuz bergani munosabati bilan uzr so‘radi va halok bo‘lganlarning oila a’zolariga yana bir bor chuqur hamdardlik bildirdi, jarohatlanganlarning tez sog‘ayib ketishini tiladi.
29-dekabr kuni Ilhom Aliyev Ozarbayjon fuqaro samolyoti Rossiya hududida, Grozniy shahri yaqinida tashqaridan shikastlanganini va deyarli boshqaruvni yo‘qotganini ma’lum qildi. Uning so‘zlariga ko‘ra, kema radioelektron kurash vositalari bilan boshqarib bo‘lmaydigan holatga keltirilgan.
Bundan tashqari, Ozarbayjon prezidenti Rossiyaga nisbatan talablarni e’lon qildi.
“Birinchidan, Rossiya tomoni Ozarbayjondan kechirim so‘rashi kerak. Ikkinchidan, u o‘z aybini tan olishi kerak. Uchinchidan, aybdorlar jazolanishi va jinoiy javobgarlikka tortilishi, Ozarbayjon davlati, jabrlangan yo‘lovchilar va ekipaj a’zolariga tovon to‘lanishi kerak. Bu bizning shartlarimiz. Ulardan birinchisi kecha bajarildi. Umid qilamanki, qolgan shartlarimiz ham qabul qilinadi,” dedi Aliyev.
Bortda qancha yo‘lovchi bo‘lgan
Qozog‘iston Favqulodda vaziyatlar vazirligi ma’lumotlariga ko‘ra, bortda 62 yo‘lovchi va 5 ekipaj a’zosi bo‘lgan:
42 nafar Ozarbayjon fuqarosi;
16 nafar Rossiya fuqarosi;
6 nafar Qozog‘iston fuqarosi;
3 nafar Qirg‘iziston fuqarosi.
Omon qolganlar orasida Ozarbayjon, Rossiya va Qirg‘iziston fuqarolari bor. Ma’lumotlarga ko‘ra, shu vaqtgacha 29 kishi halokatdan omon qolgan, ayrimlarining ahvoli og‘ir.
Izoh (0)