Rossiyada developerlar kadrlar keskin yetishmasligi sharoitida Janubi-sharqiy Osiyo mamlakatlaridan ishchi kuchi yollashni boshladi. Mazkur ishchilar Markaziy Osiyodan keladigan migrantlarga nisbatan kamroq maosh talab qilishi ta’kidlandi. Bu haqda “Kommersant” xabar berdi.
Qurilish sohasidagi “Samolyot” guruhi kompaniyasi sinov tariqasida ishchilarni Hindistondan olib kelmoqda.
Ularning o‘ziga xos xususiyatlari bor. Hozircha buni juda muvaffaqiyatli tajriba deb aytib bo‘lmaydi, lekin biz sinab ko‘ryapmiz. Ular kamroq ish haqi talab qiladi. Katta afzalligi shundaki, agar ular kelib, shartnoma imzolagan bo‘lsa, ish beruvchini o‘zgartira olmaydi, deydi kompaniyaning operatsion direktori Aleksey Akindinov.
Rossiyadagi bizneslar so‘nggi paytlarda Hindistondan ishchi kuchini faol ravishda izlamoqda. Mehnat bozorida MDH davlatlaridan kelgan migrantlar uchun sharoitlar kamroq jozibador bo‘lib bormoqda. Dekabr oyida onlayn-riteyler Ozon ombor majmualariga Hindistondan ishchilarni jalb etishni rejalashtirganini ma’lum qildi. Kiyim ishlab chiqaruvchilar va yetkazib berish xizmatlarining ham arzon ishchi kuchiga talabi ortmoqda.
Hindistondan keladigan migrantlar viza asosida keladi. Har qanday vizali migrant, mamlakatning ichki ishlar va xavfsizlik idoralari nuqtayi nazaridan, patentli migrantdan yaxshiroq. Ayni paytda Hindistondan ishchi kuchi taklifi talabni ancha ortda qoldiradi. Menimcha, hindistonlik quruvchilar ishlayotgan obyektlar soni ortadi, degan Quruvchilar milliy birlashmasi prezidenti Anton Glushkov.
U salbiy jihatlarga til bo‘yicha to‘siq, ishchi malakasi darajasiga oid savollar va ish beruvchi hamda xodim o‘rtasidagi o‘zaro munosabatlarga boshqacha yondashuv kabi omillarni kiritdi.
Izoh (0)