Rossiya-Ukraina urushi fonida Litva hukumati ommaviy evakuatsiya qilishning milliy rejasini tayyorlamoqda.
![](/static/2024/09/10/photo_2024-09-10_18-46-52-tgieKMvz.jpg)
Mamlakat ichki ishlar vaziri Agne Bilotaytening ma’lum qilishicha, tegishli loyiha oktyabr oyida taqdim etiladi.
“Har bir mahalliy hukumatning o‘z evakuatsiya rejasi bor, lekin biz milliy miqyosdagi rejaga ega bo‘lishimiz va uni amalga oshirishga tayyor bo‘lishimiz kerak”, deydi Bilotayte.
Uning so‘zlariga ko‘ra, Vilnyus bu masalada boshqa Boltiqbo‘yi davlatlari bilan hamkorlik qilishga va YIdan mablag‘ olish uchun ariza berishga qaror qilgan.
Litva Ichki ishlar vazirligi 6-sentyabr kuni mintaqa davlatlarini fuqarolik xavfsizligini gibrid va harbiy tahdidlarga moslashtirishni taklif qilayotganliklarini bildirgan.
Vazirlik, zarur hollarda qo‘shni davlatlar va mintaqaning boshqa mamlakatlariga evakuatsiya qilish mumkinligini aytgan. Vilnyusda rejalar ishlab chiqilgandan so‘ng, “qo‘shma mashqlar paytida ularni sinab ko‘rish” taklif qilinadi. Jarayonga jamoat, nodavlat tashkilotlar, biznes, xalqaro tuzilmalar va Yevropa Ittifoqi institutlari jalb qilinishi mumkin.
“Biz endi tinchlik davridagi fuqarolik mudofaasi choralariga tayanolmaymiz”, deydi Bilotayte.
Mamlakatda, shuningdek, favqulodda va inqirozli vaziyatlarni boshqarishning yangi modeli yaratilgan, boshpanalar tarmog‘i faol kengaytirilmoqda, aholini ogohlantirish tizimi modernizatsiya qilinmoqda.
Munitsipalitet va vazirliklarda allaqachon fuqarolik xavfsizligi uchun mas’ul bo‘lgan 65 nafar ixtisoslashgan mansabdor shaxslar bor va Belarus AESda yuzaga kelishi mumkin bo‘lgan avariyaga tayyorgarlik ko‘rish bo‘yicha besh yillik kompleks chora-tadbirlar rejasi yakunlanmoqda.
Litva Seymi 2030-yilgacha fuqaro muhofazasini rivojlantirish dasturini tasdiqlagan, buning uchun 285 million yevro ajratilgan.
Izoh (0)