Yevropa ittifoqining (YI) o‘nta mamlakati Rossiya gazini import qilishni butunlay taqiqlashga chaqirmoqda. Tashabbusni o‘z ichiga olgan hujjatni Litva, Latviya, Estoniya, Daniya, Chexiya, Polsha, Ruminiya, Shvetsiya, Irlandiya va Finlyandiya imzoladi. Bu haqda Bloomberg xabar berdi.
Taklif ikkita yondashuvni nazarda tutadi: 2022-yilda qabul qilingan RePowerEU strategiyasi doirasida importni darhol to‘liq taqiqlash yoki bosqichma-bosqich qisqartirish. Ushbu strategiyaga asosan Yevropa ittifoqi 2027-yilgacha Rossiya gazidan butunlay voz kechib, boshqa mamlakatlardan gaz yetkazib berish va qayta tiklanadigan energetikani rivojlantirishni rejalashtirmoqda. Biroq hujjat mualliflari rejani amalga oshirishni tezlashtirishni talab qilgan.
Shu sababli Yevropa ittifoqi fevral oyi oxirida, Ukrainada urush boshlanganining 3 yilligi arafasida e’lon qilinishi rejalashtirilgan Rossiyaga qarshi sanksiyalarning yangi, 16-paketi ustida ishlamoqda.
YI allaqachon Rossiya neftini import qilishni taqiqlagan bo‘lsa-da, ayrim davlatlarning Moskvadan keladigan gazga qaramligi unga qarshi sanksiyalarga to‘sqinlik qilmoqda. Har qanday cheklov choralari Yevropa ittifoqiga a’zo barcha 27 davlatning bir ovozdan ma’qullashini talab qiladi. Biroq Vengriya bosh vaziri Viktor Orban bunga qarshi chiqishi ehtimoli yuqori.
Yevropa komissiyasi kelgusi oyda Rossiya energiyasidan bosqichma-bosqich voz kechish bo‘yicha batafsil rejani taqdim etishi kerak. Biroq Yevropada sovuq ob-havo va AQSHning Rossiya energetikasiga qarshi yangi sanksiyalari tufayli gaz narxi asta-sekin oshishi sababli xavotirlar ortmoqda.
Yevropa ittifoqining energiya resurslarini diversifikatsiya qilish bo‘yicha sa’y-harakatlariga qaramay, urush boshlanganidan beri Rossiyadan neft, gaz va ko‘mir importining umumiy qiymati 200 milliard yevrodan oshdi (204 milliard dollar).
Izoh (0)