Polsha hukumati Belarus va Rossiya bilan chegaradagi Sharqiy qalqon mudofaa istehkomlari chizig‘ida piyodalarga qarshi minalar o‘rnatishni rejalashtirmoqda. Bu haqda Polsha mudofaa vaziri o‘rinbosari Pavel Baydaga tayanib, “TASS” xabar berdi.
Bu piyodalarga qarshi minalar “Sharqiy qalqon” elementlaridan biri bo‘ladi, dedi Bayda.
Uning so‘zlariga ko‘ra, Polshaga bir milliongacha piyoda askarlarga qarshi minalar kerak, ularni mamlakat ichida ishlab chiqarish rejalashtirilgan.
Buni Polsha qurol-yarog‘ guruhi zavodlari amalga oshiradi, ammo tafsilotlarga to‘xtalib o‘tirmoqchi emasman, dedi siyosatchi.
18-mart kuni Polsha, Litva, Latviya va Estoniya mudofaa idoralari rahbarlari o‘z hukumatlariga piyodalarga qarshi minalarni taqiqlash bo‘yicha Ottava konferensiyasidan chiqishni tavsiya qilgani to‘g‘risida qo‘shma bayonot berdi. Ular bunday qarorga mintaqada xavfsizlik sohasidagi vaziyatning yomonlashgani sabab bo‘lganini aytgan.
Piyodalarga qarshi minalarni taqiqlash to‘g‘risidagi Ottava konvensiyasi 1999-yilda kuchga kirdi, unga 164 davlat, shu jumladan, Ukraina qo‘shilgan. Xalqaro Qizil Xoch qo‘mitasi ma’lumotlariga ko‘ra, ushbu turdagi qurollar tinch aholi orasida ko‘plab qurbonlarga olib keladi va harbiy harakatlar tugaganidan keyin ham uzoq yillar davomida xavf tug‘dirishda davom etadi.
Izoh (0)