Ҳарбий сирлар, жумладан қирувчи самолётларга доир махфий маълумотларни хорижлик агентларга сотган хитойлик муҳандис ўлимга ҳукм қилинди. Бу ҳақда Хитой Давлат хавфсизлиги вазирлигига таяниб South China Morning Post хабар бермоқда.
Маълум қилинишича, Лиу фамилияли муҳандис тадқиқот институтида ишлаган вақти махфий ҳужжатларни ноқонуний равишда нусхалаб, кейинчалик уларни хорижий разведка агентларига сотган. Вазирликнинг таъкидлашича, Лиу бунга иш жойидаги адолатсизликдан норози бўлгани сабаб қўл урган.
Шундан сўнг у инвестиция компаниясига ишга кириб, қимматли қоғозлар билан савдо қила бошлаган. Бироқ молиявий муаммолар сабаб катта қарзга ботиб қолган. Бу эса уни давлат сирларини сотишга ундаган. Лиу бир неча SIM-карта сотиб олиб, турли тахаллуслар остида фаолият юритган ҳамда шу орқали хорижий разведка агентлиги билан боғланган. Бироқ агентлик махфий маълумотларни арзон нархда сотиб олиб, кейин Лиу билан алоқани узиб қўйган.
"Аммо Лиу ўз ҳаракатларининг жиддийлигини англамади. Унинг "ўйинқарор менталитети" янада мураккаб усулларни ишлаб чиқишга ундаган", — дейилади вазирлик баёнотида.
Муҳандис кейинги олти ой давомида бир неча мамлакатга саёҳат қилиб, махфий ҳужжатларни сотишда давом этган. Бу эса давлат сирларининг кенг миқёсда ошкор бўлишига олиб келган. Лиуга нисбатан ўлим жазоси ҳукми чиқарилди. Бироқ унинг қачон ижро этилиши номаълум.
"Лиу кейси" Хитой яқин тарихидаги ягона кейс эмас. 2015 йили хорижий разведка агентлигига давлат сирларини сотган олим Ҳуанг Ю ҳибсга олиниб, 2016 йилда қатл этилган эди.
Изоҳ (0)