Toshkent viloyati hokimi Zoir Mirzayev viloyatdagi fermer xo‘jaliklari haqida gapirib, 200 gektargacha yeri bo‘lgan fermerlar ham soliq to‘lovlaridan qochish uchun ishchilarini qonuniy mehnat shartnomasi asosida ishga olmayotganini, biroq statistikada ko‘plab ishchisi borligini ko‘rsatuvchi yolg‘on maʼlumotlar berganini aytib, “bu jinoyat” dedi.
Zoir Mirzayevning matbuot kotibi Behzod Qobulovga ko‘ra, hokim bu haqda Bekobod tumanida viloyatda faoliyat yurituvchi fermerlar bilan uchrashuvi chog‘ida gapirgan.
O‘zimga 320 tonna g‘alla qoldi, deydi fermer. Nima qildingiz bu g‘allani, deb so‘rasangiz, ishchilarimga bo‘lib berdim, deydi. Statistikani ko‘tarsak, 48 nafar odamning ishga olingani haqida hisobot bor. Lekin soliq bazasini ko‘tarsangiz, to‘rtta: o‘zi, xotini, qizi va kelini bor. Tamom, boshqa odam yo‘q. Kechirasiz-u, fermer xo‘jaliklari aholiga ish bermasa, kim beradi? Paxta, g‘alla yoki sabzavotning o‘zi bo‘lmaydi-ku, deydi Zoir Mirzayev.
Qishloq xo‘jaligi vaziri Ibrohim Abdurahmonov, viloyat rahbari Zoir Mirzayev ishtirokida o‘tkazilgan seminarda 2025-yil hosili uchun viloyatda jami 45,5 ming gektar maydonga chigit ekish rejalashtirilgani ochiqlangan.
Aytilishicha, joriy yilda hududdagi mavjud chigit ekiladigan maydonning 21 ming 878 gektariga Xitoy texnologiyasi asosida chigit ekiladi.
Shundan 12 ming 770 gektari xorijiy navlar, 9 ming 108 gektari mahalliy chigit urug‘i innovatsion texnologiyalar asosida 76x10 sxemada ekiladi. Qolgan 23 ming 660 gektari mahalliy usulda 76 sxemada ekilishi hisob-kitob qilingan. Paxta yetishtirishda 8 ta tumanda 971 ta fermer xo‘jaliklari va klasterlar tomonidan faqat zamonaviy texnologiyalardan foydalanish talab etiladi, deydi masʼullar.
Viloyat hokimining qo‘shimcha qilishicha, davlat rahbarining topshirig‘i bilan joriy mavsumda ham fermerlarga imtiyozli kredit ajratilib, hatto fermer xo‘jaliklari ishchilari uchun maosh pullari ham berilgan. Ammo fermer xo‘jaligi rahbarlari ishchilari haqini qonuniy tarzda to‘lamayapti.
Bankdan ish haqini olyapti, lekin o‘sha oylik fermerning ishchisiga berilganini tasdiqlovchi hujjat yo‘q. Na plastikka ko‘chirgan, na naqd qilib bergan. Bu jinoyat, deydi Zoir Mirzayev.
Tadbir yakunida taʼkidlanishicha, viloyatda 1-aprelga qadar chigit ekish ishlari yakunlanishi rejalashtirilgan.
Izoh (0)