NATO o‘z tarixidagi eng yirik harbiy-havo mashg‘ulotlari Air Defender 23 ga start berdi. Ular 23-iyunga qadar davom etadi. Mashqlarda 20 dan ortiq davlat va 250 ga yaqin samolyotlar, jumladan AQSH va Niderlandiyada ishlab chiqarilgan F-35 qiruvchi-bombardimonchilari ishtirok etmoqda, deb xabar berdi Bloomberg.
AFP maʼlumotlariga ko‘ra, mashg‘ulotlarga 10 ming askar jalb qilingan. Manyovrlar Germaniyaning to‘rtta hududi, shuningdek, Niderlandiya va Chexiya hududlarida o‘tkazilmoqda. Air Defender 23 o‘tkaziladigan havo maydonlari fuqarolik parvozlari uchun qisman yopiladi. Germaniyaning Lufthansa aviakompaniyasi bunga tayyorgarlik ko‘rayotganini ma’lum qildi.
Germaniya Harbiy-havo kuchlari generali Ingo Gerxartsning AFP’ga aytishicha, mashg‘ulotlar 2018-yilda rejalashtirilgan, ular 2014-yilda Qrimning Rossiyaga qo‘shib olinishiga qisman javob bo‘lishi kerak edi. Shu bilan birga, u mashqlar “hech kimga qaratilmagan”ini aytdi.
Avvalroq Serbiya hududida 16-iyundan 30-iyunga qadar AQSH va NATOning yana o‘nta davlati bilan hamkorlikda tashkil etilgan Platinum Wolf-2023 harbiy mashg‘ulotlari o‘tkazilishi xabar qilingandi.
Shuningdek, Rossiya va Xitoy 2023-yilda qo‘shma harbiy mashg‘ulotlar o‘tkazishni rejalashtirmoqda. Rossiya va Xitoy 6-iyun kuni Yapon dengizi ustida havo kuchlarining harbiy mashg‘ulotlarini o‘tkazgandi. Jurnalistlar Xitoy G‘arb bilan qarama-qarshilik fonida Rossiyani asosiy hamkor deb biladi. U Ukrainaga hujumni qoralash yoki rus qo‘shinlarini olib chiqishga chaqirishdan bosh tortgan.
Izoh (0)