AQSH Eronga texnologiyalarni yetkazib berishda ayblanayotgan xitoylikni qo‘lga olish uchun 15 million dollar mukofot e’lon qildi.
Tegishli mukofot AQSH Federal qidiruv byurosi tomonidan ilgari surilgan. Xitoy fuqarosi Chjun Amerika elektron komponentlarini Xitoy va Gonkong orqali Eronga noqonuniy eksport qilganlikda ayblanmoqda. AQSH Eronning Islom inqilobi gvardiyasi va uning Quds kuchini xorijiy terrorchi tashkilot deb tan olgan.
Federal qidiruv byurosiga ko‘ra, tovarlar aynan shu tashkilotlar uchun yetkazib berilgan. Ular esa tovarlardan harbiy texnika, jumladan, dronlar, ballistik raketa tizimlarini ishlab chiqarishda foydalangani aytilmoqda. AQSH Adliya departamenti 2024-yilda Chjundan tashqari yana uch nafar Xitoy fuqarosini Eronning dronlar va raketa tizimlari uchun cheklangan komponentlarni noqonuniy yo‘li bilan sotishda til biriktirganlikda ayblagan.
Islom inqilobi qo‘riqchilari korpusi dunyo bo‘ylab ko‘plab terrorchilik hujumlari va faoliyatlarini, jumladan, HAMAS, “Hizbulloh” va Iroqdagi Eron tomonidan qo‘llab-quvvatlanadigan harbiy guruhlarni moliyalashtirgan. Moliyalashtirish qisman harbiy uskunalar, jumladan, dronlarni sotish orqali amalga oshiriladi, deyiladi Davlat departamenti bayonotida.
AQSH prezidenti Donald Trampning aytishicha, u ikki hafta oldin Eron oliy rahnamosi Ali Xomanaiyga maktub yo‘llab, Tehronni yadro qurolini qo‘lga kiritishdan qaytarish maqsadida to‘g‘ridan-to‘g‘ri muzokaralar olib borishni taklif qilgan.
Izoh (0)