Ilgari faqat ilmiy fantastikada mavjud bo‘lgan kosmosda foydali qazilmalarni qazib olish endi haqiqatga aylanmoqda. Yaqinda Xitoyning Szyansu viloyati (Sharqiy Xitoy) Syuychjou shahrida joylashgan Xitoy kon-texnologiya universitetida Xitoydagi birinchi kosmik robot-konchi yaratildi. Bu haqda Sinxua agentligi xabar bermoqda.
Robotni Xitoy kon-texnologiya universiteti professori Lyu Sinxua boshchiligidagi tadqiqotchilar guruhi ishlab chiqqan. Robot-konchi oltita oyoqqa ega bo‘lib, uchta oyog‘ida g‘ildiraklar, qolgan uchtasida esa tirnoqsimon mahkamlash moslamalari o‘rnatilgan. Lyu Sinxua jurnalistlarga bunday tuzilish asosan kosmosdagi mikrogravitatsiya sharoitlariga moslashish uchun ishlab chiqilganini aytdi.
Robot-konchi sayyoralararo osmon jismlarining yuzasida geologik qidiruv va foydali qazilmalarni yig‘ish vazifalarini bajarishi kerak, bunda burg‘ilash muhim ko‘nikma hisoblanadi. Yer sharoitida robotning o‘z og‘irligi parmani ushlab turish uchun yetarli, Oyda esa tortishish kuchi Yerdagining oltidan birini tashkil etadi.
Ishlab chiquvchilarning aytishicha, vaznsizlik tufayli yuzaga keladigan siljish muammosini hal qilish uchun ular robot uchun hasharotlarning tirnoqli tikanlari tuzilishiga o‘xshash tirnoqli oyoq konstruksiyasini yaratishgan.
“Moslashuvchan tuzilish notekis yuzada barqarorlikni ta’minlaydi va robotga burg‘ilash ishlarini amalga oshirish imkonini beradi”, deydi ixtirochilar.
Hozirgi vaqtda ishlab chiquvchilar ushbu robot namunasi uchun patent olish uchun tegishli idoralarga ariza topshirgan.
Mutaxassislarning fikricha, Yerning yagona tabiiy yo‘ldoshi bo‘lgan Oy Yerga nisbatan yaqin joylashgan va resurslarga boy. Hozirgi kunda Oy resurslarini qidirish va o‘rganish butun dunyo e’tiborini tortmoqda va katta miqdordagi sarmoyalarni jalb qilmoqda.
Bundan tashqari, Quyosh tizimidagi ko‘plab asteroidlar ham mineral resurslarga boy. Ular orasida Yerga yaqin asteroidlar orbitasi Yerga nisbatan yaqin joylashgan. Hozirgi vaqtda 1500 dan ortiq Yerga yaqin asteroidlar resurslarni o‘zlashtirish uchun juda katta qiymatga ega ekanligi aniqlangan.
Izoh (0)