Xitoy Chjuxayda bo‘lib o‘tadigan Airshow China 2024 xalqaro aerokosmik ko‘rgazmasida yangi J-35A qiruvchi samolyotini taqdim etishga tayyorlanmoqda. Bu haqda Xitoy armiyasi harbiy-havo kuchlari qurol-yarog‘ bo‘limi vakili polkovnik Nyu Venbo ma’lum qildi.
Ushbu ko‘rgazma 12—17-noyabr kunlari Xitoy janubidagi Guangdong provinsiyasida bo‘lib o‘tadi.
“J-35A o‘rta o‘lchamli ko‘p maqsadli qiruvchi samolyot bo‘lib, u Xitoyning 15-havo kuchlari ko‘rgazmasida namoyish etiladi”, dedi Nyu Venbo.
Shuningdek, ushbu ko‘rgazmada Hun-19 raketa tizimi va yangi ko‘p funksiyali hujum va razvedkaga mo‘ljallangan dron ham birinchi marta taqdim etiladi. Shuningdek, Y-20 samolyotining yuk bo‘limi ham ko‘rikdan o‘tkaziladi.
“J-35A qiruvchi samolyotining ochiq namoyishi Xitoy harbiy-havo kuchlari bir vaqtning o‘zida ikkita radarlarda ko‘rinmaydigan qiruvchi samolyotga ega bo‘lishini anglatadi – J-20 va J-35A. Bu borada Xitoy dunyodagi ikkinchi davlatga aylanadi. Hozirgacha faqat AQSHda radarlarda ko‘rinmaydigan ikkita qiruvchi samolyot — F-22 va F-35 bor edi”, deya tushuntirdi harbiy ekspert Li Li.
Qayd etilishicha, J-35 qiruvchi samolyotlar seriyasining bir qismiga aylanishi va kelajakda keng ko‘lamda ishlatilishi mumkin, bu esa Xitoyning havo va dengiz operatsiyalaridagi umumiy harbiy qudratini sezilarli darajada oshiradi.
Izoh (0)