Xitoy va Rossiyaga qarashli harbiy samolyotlar 24-iyul kuni AQSHning Alyaska shtati tomonga qarab parvozni amalga oshirgan. Bu haqda Reuters nashri xabar berdi.
Chorshanba kuni Alyaska havo mudofaasi boshqarmasi shtatga yaqinlashayotgan obyektlarni payqagan. Ko‘p o‘tmay esa g‘arbiy hududda havo radarlari ishlab ketgan.
Radarlar yaqinlashayotgan obyektlar Rossiya va Xitoyga tegishli ikkita harbiy samolyot ekanini ko‘rsatgan. Bunga javoban AQSH armiyasi qiruvchi samolyotlarini havoga ko‘targan.
AQSH harbiylari faollashuvidan keyin ikki davlat samolyotlari o‘z yo‘nalishini faol o‘zgartirgan. AQSH hududidan uzoqlashib, xalqaro havo hududi bo‘ylab uchgan.
“Rossiya va Xitoy samolyotlari xalqaro havo hududida qoldi va Amerika yoki Kanada suveren havo hududiga kirmadi. Tomonlar o‘rtasida keskinlik yuzaga kelmadi”, deyiladi Shimoliy Amerika aerokosmik mudofaa qo‘mondonligi bayonotida.
AQSH harbiylari samolyotlar tahdid sifatida ko‘rilmaganini bildirgan, chunki ular asosan tartibli nishonlarni ura oladigan eski namunadagi harbiy samolyotlar bo‘lgan. Vashington maʼmuriyati Shimoliy Amerika yaqinidagi “raqobatchilar faoliyatini” muntazam kuzatishda davom etishini bildirgan.
Maʼlumot o‘rnida, joriy yilning 21-iyul kuni AQSH strategik bombardimonchi samolyotlari Rossiya chegaralari tomon parvozni amalga oshirgan edi. Barens dengizi janubida havo signallari ishlab ketishi oqibatida esa Moskva raqib samolyotlarini quvib chiqarish uchun havoda manyovrlar boshlagan. Shundan so‘ng bombardimonchi samolyotlar Rossiya hududidan uzoqlashgan.
Izoh (0)