Indoneziyaning Flores orolidagi to‘rt mingdan ortiq qishloq aholisi Levotobi Laki-Laki vulqoni otilishi sababli o‘z uylarini tark etishga majbur bo‘ldi.
Ma’lum qilinishicha, vulqon otilishi oqibatida balandligi 8 ming metrdan ortiq bo‘lgan kul ustuni ko‘tarilgan. Atrofdagi qishloqlar kul bilan qoplangan. Oqibatda Bali aeroporti bir nechta xalqaro reyslarni bekor qildi.
Indoneziya geologiya agentligi ma’lumotlariga ko‘ra, vulqon uch marta - 20-mart kuni kechqurun va 21-mart kuni ikki marta otilgan. Oxirgi otilishda vulqon krateridan qalin kulrang bulutlar ko‘tarilayotgani kuzatilgan.
Vulqondan deyarli 800 kilometr uzoqlikda joylashgan Indoneziyaning mashhur sayyohlik oroli Bali bilan Avstraliya o‘rtasidagi bir nechta reyslar aviakompaniyalar tomonidan bekor qilindi. 21-mart kuni ertalab yettita reys bekor qilindi: ularning oltitasi Jetstar aviakompaniyasining Avstraliyaga va bittasi Air Asia aviakompaniyasining Kuala-Lumpur yo‘nalishidagi reyslardir.
Rasmiylar vulqon otilish xavfi darajasini eng yuqori darajaga ko‘tardi va vulqon atrofida radiusi 7-8 kilometr bo‘lgan xavfli zonani belgiladi. Indoneziya tabiiy ofatlarga qarshi kurash agentligi 21-mart kuni mahalliy hukumat 14 kunlik favqulodda holat e’lon qilgani va vaziyatni nazorat qilayotganini ma’lum qildi.
Jami 4700 nafar aholi evakuatsiya qilingan. Mahalliy aholining xabar berishicha, plantatsiyada ishlayotgan odamlar kuldan kuygan. Aholi yaqin kunlarda hushyor bo‘lishi kerakligi, kuchli yomg‘irlar vulqon ko‘chkilariga sabab bo‘lishi mumkinligi haqida ogohlantirilgan.
Ma’lumot uchun, hududida 130 ga yaqin faol vulqon mavjud bo‘lgan Indoneziya Tinch okeani olov halqasida joylashgan bo‘lib, bu Yer yuzidagi eng geologik faol zona hisoblanadi.
Izoh (0)