Indoneziyaning Yava orolidagi Semeru vulqonining otilishi oqibatida halok bo‘lganlar soni 34 kishiga yetdi. Bu haqda 7-dekabr kuni Indoneziya tabiiy ofatlar oqibatlarini bartaraf etish milliy agentligiga tayanib, “Korrespondent.net” xabar berdi.
Agentlik matbuot kotibi Abdul Muxariyning so‘zlariga ko‘ra, 17 kishi bedarak yo‘qolgan deb hisoblanmoqda. Ularni qidirishda itlardan foydalanilmoqda. Xavfli hududdan qariyb 3700 kishi evakuatsiya qilingan.
Rasmiylar havoning ifloslanishi sababli Semeru vulqoniga 5 kilometrdan ortiq yaqin bormaslikni tavsiya qildi. Avvalroq hududda uchta kichik vulqon otilishi qayd etilgan, ularning har biri taxminan bir kilometr balandlikka kul otgan.
4-dekabr kuni Yava orolidagi Semeru vulqoni otilishni boshladi. Semeru — Indoneziyadagi 130 ga yaqin faol vulqonlardan biri. Undan otilgan kul ustuni 15 kilometr balandlikka ko‘tarildi, natijada aviakompaniyalar o‘z yo‘nalishini o‘zgartirishga majbur bo‘ldi. Vulqon yaqinida joylashgan 11 qishloq, jumladan, Sumber Vulux qalin kul va vulqon changi ostida qoldi. Hududdagi achchiq tutun, elektr energiyasi yo‘qligi va tropik yomg‘ir qidiruv-qutqaruv ishlariga to‘sqinlik qilmoqda.
Izoh (0)