Indoneziyada harbiylarning mamlakatni boshqarishdagi vakolatlarini kengaytiruvchi qonun loyihasiga qarshi ommaviy namoyishlar boshlandi. Bu haqda mahalliy nashrlar xabar bermoqda.
Jakartada namoyishchilar mahalliy qonun chiqaruvchi hokimiyat vakolatxonasi binosini graffiti bilan qoplagan. Shimoliy Sulavesi viloyatida esa namoyish ishtirokchilari politsiya transportiga chiqib, ular bilan mushtlashuvga kirishgan.
Mamlakat poytaxti Jakartada namoyishchilar mamlakat parlamenti binosiga kirgan. Ular majmua to‘sig‘ini buzganidan so‘ng, politsiya suv purkagichlarni ishga tushirgan. Biroq namoyishchilarning bir qismi hali ham parlamentga tegishli hududda qolmoqda.
X ijtimoiy tarmog‘ida tarqalgan videolarda namoyishchilar “inqilob” deya hayqirayotganini ko‘rish mumkin.
“Harbiylar to‘g‘risidagi qonunga qarshi ommaviy namoyish politsiya tomonidan bostirilyapti. Namoyishchilar parlament binosidan uzoqlashtirildi. Bundan oldin talabalar asosiy darvoza oldidagi to‘siqni buzib, parlament hududiga kirib olishgandi”, deb yozmoqda Beritasatu nashri.
Mahalliy ommaviy axborot vositalari xabar berishicha, namoyish paytida bir necha kishi jarohat olgan. Jabrlanganlarning aniq soni hozircha ma’lum qilinmagan. Biroq namoyish ishtirokchilari asosan talabalar — ijtimoiy tarmoqlarda politsiya bilan to‘qnashuvlar oqibatlari haqida faol ravishda ma’lumot tarqatib, inson huquqlari himoyachilarini vaziyatga aralashishga chaqirmoqda.
Bunga qadar payshanba kuni Indoneziya parlamenti Indoneziya qurolli kuchlari to‘g‘risidagi qonunga munozarali o‘zgartirish kiritib, harbiylar egallashi mumkin bo‘lgan davlat lavozimlarining ro‘yxatini kengaytirgan edi. Ushbu o‘zgartirishga qarshi chiquvchilar bu holat harbiylar tomonidan hokimiyatni suiiste’mol qilish va inson huquqlarining buzilishiga olib kelishidan xavotirda.
Qayta ko‘rib chiqilgan qonun amaldagi harbiy xizmatchilar egallashi mumkin bo‘lgan fuqarolik davlat lavozimlari sonini 10 tadan 15 tagacha kengaytirmoqda.
Qo‘shimcha beshta lavozimga siyosiy, huquqiy va xavfsizlik masalalari bo‘yicha muvofiqlashtiruvchi vazirlik, bosh prokuratura va oliy suddagi lavozimlar kiradi.
Izoh (0)