Индонезиянинг Флорес оролидаги тўрт мингдан ортиқ қишлоқ аҳолиси Левотоби Лаки-Лаки вулқони отилиши сабабли ўз уйларини тарк этишга мажбур бўлди.
Маълум қилинишича, вулқон отилиши оқибатида баландлиги 8 минг метрдан ортиқ бўлган кул устуни кўтарилган. Атрофдаги қишлоқлар кул билан қопланган. Оқибатда Бали аэропорти бир нечта халқаро рейсларни бекор қилди.
Индонезия геология агентлиги маълумотларига кўра, вулқон уч марта - 20 март куни кечқурун ва 21 март куни икки марта отилган. Охирги отилишда вулқон кратеридан қалин кулранг булутлар кўтарилаётгани кузатилган.
Вулқондан деярли 800 километр узоқликда жойлашган Индонезиянинг машҳур сайёҳлик ороли Бали билан Австралия ўртасидаги бир нечта рейслар авиакомпаниялар томонидан бекор қилинди. 21 март куни эрталаб еттита рейс бекор қилинди: уларнинг олтитаси Jetstar авиакомпаниясининг Австралияга ва биттаси Аir Asia авиакомпаниясининг Куала-Лумпур йўналишидаги рейслардир.
Расмийлар вулқон отилиш хавфи даражасини энг юқори даражага кўтарди ва вулқон атрофида радиуси 7-8 километр бўлган хавфли зонани белгилади. Индонезия табиий офатларга қарши кураш агентлиги 21 март куни маҳаллий ҳукумат 14 кунлик фавқулодда ҳолат эълон қилгани ва вазиятни назорат қилаётганини маълум қилди.
Жами 4700 нафар аҳоли эвакуация қилинган. Маҳаллий аҳолининг хабар беришича, плантацияда ишлаётган одамлар кулдан куйган. Аҳоли яқин кунларда ҳушёр бўлиши кераклиги, кучли ёмғирлар вулқон кўчкиларига сабаб бўлиши мумкинлиги ҳақида огоҳлантирилган.
Маълумот учун, ҳудудида 130 га яқин фаол вулқон мавжуд бўлган Индонезия Тинч океани олов ҳалқасида жойлашган бўлиб, бу Ер юзидаги энг геологик фаол зона ҳисобланади.
Изоҳ (0)