AQSH parranda grippi tufayli tuxum taqchilligi kuchayib borayotgan bir paytda, Yevropa mamlakatlaridan, jumladan, Finlyandiyadan ehtimoliy yordam so‘radi. Bu haqda Yle xabar berdi.
Biroq Finlyandiya Parrandachilik uyushmasi ijrochi direktori Veera Lehtilaning ta’kidlashicha, Helsinkining AQSHga tuxum yetkazib berishi dargumon. Sababi Vashington bilan bu borada hech qanday eksport kelishuvi mavjud emas.
Kelishilgan qoidalar bo‘lmasa, eksportni boshlash oson emas, dedi Lehtila.
Shuningdek, u Finlyandiya tuxum eksportini yo‘lga qo‘ygan taqdirda ham, bu AQSHdagi taqchillik muammosini hal qila olmasligini qayd etdi. Bundan tashqari, parranda grippi faqat AQSHdagina emas, balki Yevropada ham muammo bo‘lib qolayotganini eslatib o‘tdi.
Hozircha Finlyandiya bu vaziyatni yaxshi boshqarmoqda, ammo infeksiyaning oldini olish uchun doimiy sa’y-harakatlar talab etiladi, deya qo‘shimcha qildi Lehtila.
Daniyaning Agriwatch jurnali ma’lumotlariga ko‘ra, AQSH Daniya, Shvetsiya va Niderlandiyaga ham tuxum yetkazib berish bo‘yicha so‘rov yuborgan.
Ular bizdan tuxum yetkazib bera olamizmi va qanday hajmda, deb so‘rashdi, dedi Lehtila.
Biroq Shvetsiyaning Kronäggs kompaniyasi Qo‘shma Shtatlarga tuxum eksport qilish ehtimoli juda pastligini ma’lum qildi. Buning sababi sifatida turli eksport cheklovlari va Yevropaning o‘zida ham tuxum tanqisligi borligi ko‘rsatildi.
AQSHda tuxum narxi rekord darajaga yetdi
Avvalroq AQSH tuxumni asosan Kanadadan import qilgan. Ammo prezident Donald Tramp e’lon qilgan savdo urushi tufayli bu jarayon sezilarli darajada qisqargan.
2024-yilning so‘nggi choragida parranda grippi epidemiyasi oqibatida AQSHda 20 milliondan ortiq tuxum qo‘yuvchi tovuq nobud bo‘ldi. Bu esa tuxum narxining keskin oshishiga va do‘konlarda taqchillik yuzaga kelishiga sabab bo‘ldi.
AQSH Qishloq xo‘jaligi vazirligi ma’lumotlariga ko‘ra, 2024-yil fevral oyi oxirida O‘rta G‘arb shtatlarida 12 dona tuxumning o‘rtacha narxi 8,41 dollarga yetdi. Bu o‘tgan yilga nisbatan 200 foizdan ko‘proqqa oshgan.
Narxlarning keskin ko‘tarilishi tufayli AQSH Adliya vazirligi tuxum bozori bo‘yicha tergov boshladi. Bloomberg xabariga ko‘ra, rasmiylar Cal-Maine Foods va Rose Acre Farms kabi yirik ishlab chiqaruvchilar narxlarni sun’iy oshirish va mahsulot yetkazib berishni cheklash orqali til biriktirgan-biriktirmaganini tekshirmoqda.
Izoh (0)