АҚШ президенти Дональд Трамп ва Россия президенти Владимир Путин 18 март куни телефон орқали суҳбатлашди. Бу Трампнинг президентликка киришидан сўнг, Украинадаги урушни тўхтатиш бўйича режасини амалга оширишни бошлаганидан кейинги иккинчи мулоқотдир.
Суҳбатга Кремлнинг муносабати
Кремль маълумотларига кўра, сиёсатчилар “Украина атрофидаги вазият бўйича батафсил ва очиқ фикр алмашишни давом эттирган” ва можарони ҳал қилиш бўйича саъй-ҳаракатларни давом эттириш ниятини тасдиқлаган.
Путин Трампга Украинадаги вазиятни ҳал қилиш йўлларини биргаликда ишлаб чиқишга тайёрлигини айтган. Шунингдек, АҚШ президентининг Россия ва Украинанинг энергетика инфратузилмасига 30 кун давомида зарба беришдан ўзаро воз кечиш ғоясини қўллаб-қувватлаган ва ҳарбийларга шундай буйруқ берган.
АҚШ президентининг 30 кунлик тинчлик ўрнатиш ташаббуси доирасида Россия томони бир қатор муҳим масалаларни кўрсатиб ўтган. Булар жанговар тўқнашув чизиғи бўйлаб эҳтимолий ўт очишни тўхтатишни самарали назорат қилишни таъминлаш, Украинада мажбурий сафарбарликни тўхтатиш ва Украина Қуролли Кучларини қайта қуроллантириш зарурияти билан боғлиқ, дейилади баёнотда.
Шунингдек, Путин америкалик ҳамкасбига 19 март куни 175 нафар асир 175 кишига алмаштирилиши ҳақида маълум қилган.
Кремль баёнотида айтилишича, томонлар “Украинадаги келишувга эришиш бўйича саъй-ҳаракатларни давом эттиришга” ва шу мақсадда Россия ва Америка эксперт гуруҳларини тузишга келишиб олган.
Оқ уй баёноти
Оқ уй баёноти анча қисқароқ бўлди. Гарчи суҳбат давомида АҚШ президентининг расмий вакили Ден Скавино унинг “яхши кетаётганини” таъкидлаган бўлса-да, Оқ уйнинг якуний баёнотида Украинадаги урушга фақат иккита абзац муносабат берилди.
Улардан бирида қуйидаги гаплар келтирилган:
Лидерлар тинчликка эришиш ҳаракатлари энергия ва инфратузилма соҳаларида ўт очишни тўхтатиш, шунингдек, Қора денгизда ўт очишни тўхтатиш ва доимий тинчликка эришиш учун техник музокаралар ўтказишдан бошланишига келишиб олди. Ушбу музокаралар дарҳол Яқин Шарқда бошланади.
Шунингдек, Трамп ва Путин “стратегик қуролларни тарқатишни тўхтатиш зарурияти”, Яқин Шарқни “келажакдаги можаронинг олдини олиш учун потенциал ҳамкорлик минтақаси” сифатида ва “Исроилни йўқ қилиш имкониятига эга бўлмаслиги керак бўлган” Эронни муҳокама қилган.
Бир оз вақт ўтгач, Дональд Трамп ўзининг Truth Social ижтимоий тармоғида Путин билан алоқаларини яна “жуда яхши ва самарали” деб таърифлади. Унинг фикрича, у Путин билан энергетика обектларига дарҳол ўт очишни тўхтатиш ҳақида келишиб олган.
Зеленский қандай муносабат билдирди?
Путин ва Трамп ўртасидаги суҳбатдан бир неча соат ўтгач, Украина президенти Владимир Зеленский Америка томонидан суҳбат тафсилотларини кутаётганини маълум қилди.
У Россия энергетика инфратузилмасига зарба беришни тўхтатиш таклифини қўллаб-қувватлашини (Россия томонидан кўзгудаги қадам эвазига), бироқ АҚШ ва Россия етакчиларининг музокаралари ҳақида кўпроқ маълумот олишни исташини айтди.
Менимча, агар биз президент Трамп билан суҳбатлашсак ва ўшанда россияликлар америкаликларга нима таклиф қилганини ёки америкаликлар россияликларга нима таклиф қилганини батафсил билиб олсак, тўғри бўлади, деди Зеленский.
Кейинроқ Украина раҳбари Путиннинг баёнотларига қарамай, Россия фуқаролик инфратузилмасига ҳужум қилишда давом этаётганини айтди.
Бугун Путин амалда ўт очишни тўлиқ тўхтатиш таклифини рад этди. Дунё бунга жавобан Путиннинг урушни чўзишга бўлган ҳар қандай уринишларини рад этиши тўғри бўларди, деди у.
Икки президентнинг суҳбати тахминан бир ярим соат давом этди. Путин билан суҳбат арафасида АҚШ президенти Аир Форcе Оне бортида журналистларга Россия президенти билан суҳбатда ҳудудлар масаласини ва Россия ҳамда Украина ўртасида “муайян активларни тақсимлаш”ни муҳокама қилишни режалаштираётганини айтганди.
Ер ҳақида гаплашамиз. Биз электр станциялари ҳақида гаплашамиз, деган эди у.
Оқ уй матбуот котиби ҳам Путин билан суҳбатда Запорожье АЭС атрофидаги вазиятни муҳокама қилиш режалаштирилганини тасдиқлаган. Бир оз вақт ўтгач, Трамп ўзининг Truth Social ижтимоий тармоғида Россия раҳбари билан Украина бўйича тинчлик келишувининг кўплаб элементлари келишилганини таъкидлаб, “ҳали қилинадиган ишлар кўп”лигини айтганди.
Изоҳ (0)